Press "Enter" to skip to content

Hadien shitaiew lait jamin u Secretary ka Hima Nongspung na phatok ka Assam

Pdiang burom ka FKJGP bad HNYF ha Byrnihat

Nongpoh, Jymmang, 15: U Secretary ka Hima Nongspung u Bah Micheal Warjri, u la ïoh jamin mynta ka sngi balang na ka Iingkashari Guwahati High Court, hadien phra sngi ba u shah kem ha ki Pulit ka Jylla Assam hadien ka jingshah thombor ha ka shnong Balakhawa, Ri-Bhoi District.
Ïa u Bah Michael la leit shaw na Lokhra Central Jail, Guwahati da ki bahaiing hasem bad ki nongïalam jong ka Federation of Khasi Jaiñtia & Garo People (FKJGP) hapoh ka jingïalam u Vice President u Bah Eldie Newton Lyngdoh bad ka Hynñiewtrep National Youth Front (HNYF) Northern Region.
Lah ban kdew hangne ba ka FKJGP naduh ka sngi kaba sdang, ka khlem shongthait ban ïakhun na ka bynta ka hok jong u Bah Micheal haduh ba un da ïoh jamin. Ka FKJGP-North Khasi Hills hynnin ka sngi ba-ar ka la pynlong ïa ka jingïakhih da kaba shong kyllaiñ myngor ha Nongpoh, Ri-Bhoi District ban pynbor ïa ka Sorkar Jylla bad ki Bor District ba kin shimkhia ha kaba pynlait noh ïa u Bah Michael na ka kti jong ki Pulit ka Assam.
Ha katei ka jingpdiang bad leh burom ïa u Bah Michael la sakhi ruh ba u dang don hapdeng ka jingshitom bad ka jingtlot ka bor met bad um pat lah ban kren bha. Wat hapdeng ka jinglong tymmen u Bah Michael u la pynpaw ïa ka jingsngewnguh shikatdei ïa ki sengbhalang bad ki bahaiing kiba la don bynta ban ïarap naduh kaba sdang bad ban leit bah jamin ïa u ha Guwahati.
Na Guwahati, ki nongïalam ka Seng ki la ïalam ïa u Bah Micheal sha ka ophis treikam jong ka seng ha Mawlai Motsyiar ban pynkup burom ïa une u rangbah halor ka jingshlur jong u ban ieng ïada ïa u pud u sam na ka jingkyntur pud ka Assam, watla u long tang marwei.
U Bah Michael u la ong ba ïa mynta um pat kwah ban kren ei ei halor katei ka jingjia bad un sa kren kham bha hadien ba u la koit la khiah bad khlaiñ bha ka bor met kaba mynta u dang hap ban phah sumar ha ki doktor na ka jingshitom kaba u shah tied shah bom ha ki paidbhur.
Ka dei ha ka 7 tarik Jymmang, ki paidbhur ki la leit thombor ïa ka Iingsah jong u Bah Micheal bad ki la shoh la bom ïa u haduh ban da mynsaw jur. Kane ka jingthombor ka la mih namar ba u Bah Micheal ula pyrshah jur ïa ka project shna surok jong ka Sorkar Assam ha Balakhawa, kaba wan na ka skhim PMGSY.
Ha kane hi ka janmiet, hadien ka jingshah thombor, sa ki Pulit ka Assam ki la wan ban kem ïa u Bah Micheal haba kynnoh ba u donkti ha ka huri hura ba pynmynaw ïa uwei u briew. Ki Pulit ki la pynngat ïa u Bah Micheal ha ki kyndon thmu pynïap briew bad ka Arms Act namar ba u don ïa ka suloi ba la kut ka licence.
Ha ka jingïakren bad ki nongthoh khubor u Bah Eldie Lyngdoh u la ong ba ka seng ka la shimkhia ïa katei ka jingjia naduh ka sngi ba u Bah Michael Warjri u la shah thombor ryngkat ka jingshah bom shah tied bad shah kem noh ha ki pulit ki Assam, hynrei ka seng ka la pynpaw ka jingsngewkmen ba ka Iingbishar Guwahati High Court ka la pynlait jamin noh mynta ka sngi balang ïa u Bah Michael.
U la ong ruh ba ka sorkar ka dei ban shimkhia ïa kane ka kam bad ban wanrah noh mardor sha Meghalaya ïa ka mukotduma kaba la rejister sha Assam namar ka jingjia ka dei hapoh u pud u sam ka jylla Meghalaya bad ka Sorkar Jylla ka dei ban peit bniah bad bishar bha ïa ki mukotduma kiba la pynngat ïa u Bah Michael ki dei ki bym don nongrim bad bym ïahap satia.
“Ka seng ka pynpaw ïa ka jingsngewkmen shikatdei ïa u Bah Michael Warjri uba ieng marwei ban ïaleh bad ban ïada ïa u pud u sam kum u khun dap shynrang ha ka rta kaba la tymmen bad kane ka dei ka khubor kaba shai sha ka Sorkar MDA ba ka dei ban pynbeit shwa ïa u pud u sam hynrei haduh mynta ym i dak eiei watla shibun ki mynsiem briew ki la duh,” u la ong.
“Ngim kwah shuh ba ki mynsiem briew bad ki khun dap shynrang kiba ïaleh bad ïakhun ban ïada ïa ka ri bad ka jaitbynriew kin dang duhnoh ïa la ka jingim bad ki jingjia kiba sngewsih kin dang jia nangne shakhmat kumba jia ha Langpih bad kiwei kiwei ki jaka khappud hynrei ka Sorkar ka dei ban pynbeit noh mardor ïa u pud u sam,” ong shuh shuh u Bah Eldie.
Na ka liang ka Kong Badarilin Rani kaba dei ka khun kynthei jong u Bah Michael kaba la pynpaw ka jingsngewnguh ïa ka FKJGP bad kiwei kiwei de ki sengbhalang kiba la don bynta lang naduh ba sdang haduh mynta ka sngi ba u Kpa jong ka u la lait jamin noh.
Ka la pynpaw ruh ka jingsngewdiaw ba ka Sorkar kam shym la ïarap eiei haduh mynta hynrei dei ki nongïalam ka seng kiba la ïarap bad don ryngkat bad ki bahaiing haduh ba u kpa un ïoh ban mih noh na along mynta ka sngi.