Press "Enter" to skip to content

Kynduh ka KSU ïa ka NCST

Shillong, Jymmang 15 : Ka Khasi Student’s Union ha ka Sngi Balang ka la kyntu ïa ka National Commission for Scheduled Tribe (NCST) ba kan tuklar lang khnang ba ki jaidbynriew rit paid kiba dei ki trai ri trai muluk jong ka thaiñ shatei lam-mihngi kin ïoh ka jingïada na ka jingtur kyrthlep ki mynder na kiwei pat ki Ri.
Nalorkata, ka la kyntu ruh ba kan tuklar wat haba ïadei bad ka kynrum kynram kaba don mynta ha North East Indira Gandhi Institute of Health and Medical Sciences (NEIGRIHMS) kaba la poi haduh u pud ba ar ngut ki trai muluk ki la duh ei ïa la ka jingim tang na ka daw ka jingpynibor ki nongpynïaid jong katei ka jaka ai jingsumar.
Ka la kyntu ruh ba donkam ban kynthup lang ïa ki dkhot na ki phra tylli ki jylla ka thaiñ shatei lam-mihngi jong ka Ri kum ki dkhot ka Commission.
Na ka liang, u President ka KSU, Bah L Marngar u la ong ruh ba donkam ba wat ka Regional Office jong ka NCST dei ban pynlong noh ïa ka kum ka ophis treikam ba pura khnang ba kan lah ban ai ka jingshakri kaba kham paka ïa ki jaidbynriew riewlum.
Shuh shuh ka KSU ka kyntu ruh ïa ka Commission ban pyndap noh ïa baroh ki kam kiba thylli ha ka Regional Office ban pyntikna ïa ka jingtreikam kaba stet bad kaba ïaid beit.