Press "Enter" to skip to content

Nalor ka CAB, kular ka NCST ban ym ailad ïa ki bor nabar ban knieh ïa ka hok ki riewlum

Shillong, Jymmang 15 : Ka National Commission for Scheduled Tribes (NCST) ne ka ‘Komishon ki Riewlum’ ha ka sngi Balang ka la ong ba kan ym ailad satia ïa ki briew kiba nabar ban knieh noh ïa ka hok jong ki riewlum bad ki trai muluk trai jaka.
Ïa kane la pynpaw da u Chairperson jong ka NCST, u Nand Kumar Sai haba kren bad ki lad pathai khubor hadien ba ma u ryngkat ka Commission ki la dep ban kynduh ïa u Myntri Rangbah ka Jylla, u Conrad K Sangma ha ryngkat ka jingdonlang ki heh sorkar ha Main Secretariat.
Ha katei ka jingïalang, la ong ba ka kynhun ka la ïa kren bun ki phang bad u Myntri Rangbah khamtam eh haba ïadei bad ka bha ka miat jong ki Jaidbynriew Riewlum. Da kaba kular ïa ka jingkyrshan na ka liang ka Commission, u Sai u la kyntu ruh ïa ka sorkar jylla ba kadei ban pynneh bad pynsah ïa ka nongtymmen jong ki riewlum.
Shuh shuh haba jubab pat halor ka jingkylli halor ka Citizenship Amendment Bill, ka bill kaba la ïeng pyrshah da baroh ki riewlum jong ka thaiñ shatei lam-mihngi jong ka Ri, utei u heh ka Commission u la ong ruh ba ka jingai jingbit ban long trai ri ïa ki briew kiba nabar kan buh jingma ïa ki jaidbynriew riewlum jong ka thaiñ.
“Ka Commission kan leh la ka jong ka bynta haba ïadei bad kane bad kan ym ailad ruh ba ki briew kiba nabar kin knieh noh ïa ka hok jong ki trai muluk trai jaka,” u la ong.
Lah ban kdew hangne, ba ka BJP ka la kren shai ba kan wanrah biang ïa ka Citizenship Amendment Bill lada ka wan biang ha ka bor synshar hadien ka elekshon Lok Sabha 2019 kaba ïa ka result yn pynbna ha ka 23tarik mynta u bnai.
Haba kren pat halor ka jingduna ki samla riewlum kiba ïoh kam ha ki tnad jong ka sorkar pdeng, u Sai u la ong ba donkam ban plie noh da ka Centre kaban ai jinghikai ïa ki riewlum khnang ba kin ïoh lang ïa ka lad ban ïohkam ha ki ophis jong ka sorkar pdeng.
“Ki trai shnong ki dei ban ïoh ïa ki kam ha ki ophis treikam bapher bapher jong ka sorkar pdeng. Ïa ki eksam ïa khun kam na ka bynta ka jingbit jingbiang jong ki trai shnong ruh dei ban pynlong hangne,” u la bynrap shuh shuh.
Lah ban kdew hangne ba ha ka sngi Ba-ar, ka Commission ka la ïa kynduh ruh ïa ki MDC jong ki lai tylli ki Autonomous District Council ha kaba la pyntip ïa ki ïa kiba bun ki jingeh ba kum ki Council ki kynduh la ka long ha ka jingai ïa ki Scheduled Tribe Certificate ïa kaba la knieh noh da ka sorkar jylla, nangta ka jingduna ka jingmang tyngka ïa ki bad ruh halor ka jingdonkam ban pynrung noh ïa ka Ktien Khasi bad kiwei ki jait Ktien jong ki riewlum ha ka Khyrnit kaba Phra jong ka Riti Synshar jong ka Ri.
Na ka liang ka Commission ha kane ka sngi ka la kynduh ruh ïa ki heh jong ka North Eastern Hills University, nalor ka jingïalang bad ki heh sorkar ka jylla.