Press "Enter" to skip to content

Pynshlur ka Horticulture ban rep jhur khlem dawai

Nongpoh, Jymmang 15: Kumba bun naki jhur ha ki iew ki hat bad ba ki paidbah ki bam ha kine ki sngi kiba mynta ki dei ki jhur ba jur ki dawai kaba lah ban ktah shibun ïaaka koit ka khiah ki paidbah bad wanrah ïa ki jait jingpang ba har rukom, na ka lïang ka tnad Horticulture ka la pynshlur ïa ki paidbah nongrep ka Ri-Bhoi ba ki dei ban rep ïa ki jhur ba khlem dawai na ka bynta ka met ka phad kaba koit ba khïah bad khring ruh ïa ki briew ban thied khamtam kiba nabar.
Na ka liang ka tnad Horticulture Ri-Bhoi District mynta ka sngi ka la pynlong ruh ïa ka iew pyn-i-nam ïa ki jait jhur bapher bapher bala pynmih da ki nongrep ka Ri-Bhoi District ha ophis jong ka tnad Horticulture kaba don ha ka shnong Saiden, ha kaba la wan ruh ban sakhi da ki spah ngut ki nongrep jhur kiba la wanrah ïa ki jait jhur bapher bapher ha ka katei ka iew pyn-i-nam ba shi sngi.
Ha shwa ban sdang ïa katei ka iew pyn-i-nam na ka lïang ka tnad Horticulture ka la pynlong ruh ìaka jingïalang ha shwa ban plie ïa katei ka iew, ha kaba ka kong V Hynniewta EAC ka la long kum ka kongsan ha ka jing don lang u Bah Kyrmen Pyngrope Joint Director ka tnad Horticulture, Bah G Shylla District Horticulture Officer, Ri-Bhoi, Bah Willïam Pakyntein District Agriculture Officer, Bah H Nadon Executive Engineer ka Water Resource bad kiwei kiwei ki ophisar naki tnad sorkar bapher bapher.
Haba kren ha ka jingïalang bad ki nongrep ha shwa ban plie ïa katei ka iew pyn-i-nam, na ka lïang ka kong V Hynniewta EAC ka la ong ba ka Ri Bhoi District ka dei kawei naki district kaba pynmih bun bha ki jhur ki jhep kiba pher bapher bad ka dei ruh ka district kaba bun bha ki nongrep bad ki jingthung jingtep ba bunjait.
Ka la ong ruh ba ka RiBhoi kam duna shuh ha ka liang ka rep ka riang bad ki jait jingthung ba ka pynmih bad ka la dei ka por ban pynshlur ïa ki nongrep ba kim dei shuh ban pyndonkam dawai ha ki jhur ki jhep bad ki mar rep jong ki kaba long ruh kum ka jingïada naki jait jingpang kiba pher bapher kiba ktah ïa ki briew ha kine ki sngi ba mynta, bad lada ki nongrep ki lah ban pynmih kum kitei ki mar rep kan long ka jingkyrkhu kabaa khraw ïa ki paidbah bad khring ruh ïa ki briew ban thied ïa ki jhur ki jhep kiba lait naki dawai.
Shuh shuh ka la ong ruh kumba ka Ri-Bhoi ka lah ban pynmih bun jait ki mar rep, na ka liangka kong V Hynniewta ka la pynshlur ìaki nongrep bad ka tnad Horticulture bad Agriculture ban pynmih shuh shuh kham bun khnang ba ka jylla jong ngi kam donkam ban ap ïa ki jhur bad ki soh ki pai nabar jylla hynrei tang kiba la pynmih hapoh jylla da ki nongrep kan pyndap pynbiang bad ïoh ruh wat ban shalan shabar ban kyntiew ïa ka ïoh ka kot ki nongrep.
U Bah Kyrmen Pyngrope Joint Director ka tnad Horticulture u la pynshai sha ki nongrep ha katei ka sngi halor shibun ki skhim bad ki insurance ba ki nongrep ki lah ban ïoh naki tnad sorkar bad kumjuh ruh naki Bank kum ki kynja Insurance halor ka jingshah lyngshop ha ki bor mariang bad kiwei kiwei.
U la ong ruh ïa ki nongrep ha katei ka sngi ba ki dei ban long kiba smat ban leit mih sha ki Bank bad ki tnad sorkar kum ka Horticulture, Agriculture, lane ICAR halor ki jingïarap ba ki nongrep ki lah ban ïoh na ka bynta ban kyntieew ïa ka rep ka riang bad ai jingmyntoi ïa ki nongrep.
Lyngba kitei ki jing pynshai na ka liang ki nongrep ha katei ka sngi ki la ïoh shibun ki jingmyntoi bad lum jingtip halor ki jait skhim kaba long ka jingkyrkhu kaba khraw ïa ki nongrep jhur bad soh, bad la plie paidbah syndon ïa katei ka iew pyn-i-nam ïa ki jait jhur bapher bapher da ka kong V Hynniewta kum ka kongsan.
Na ka liang ka tnad Horticulture kum ka jingpynshlur ïa ki nongrep ka la sam ruh ïa ki khusnam sha ki nongrep kiba la jop halor ki jait jhur ba ki lah ban pynmih katkum ki mar rep jong ki.