Press "Enter" to skip to content

U Myntri Revenue u kren khlem da tip ïa ka ishu Balakhawa : S.K Sunn

Wat hadien ba la ujor bunsien sha ka sorkar jylla
Shillong, Jymmang 15 : U Myntri ka tnad Revenue, Bah Kyrmen Shylla u la shah kynthoh tyngeh halor ka jingkren jong u dang shen ba kam pat ju don ka jingujor na Balakhawa halor ka jingwanrah kam pynroi ka Assam.
Halor katei ka jingkren jong u Myntri, na ka liang u MLA ka Mawphlang, Bah SK Sunn mardor ha kane ka sngi Balang u la phah da ka jingthoh sha u Myntri da kaba ong, “Kam long satïa kaba dei ban ong ba ym ju don kano kano ka jingujor. Ha ka jingshisha, naduh u snem 2015 u Secretary ka Hima Nongspung, u la thoh sha u Deputy Commissioner ka Ri Bhoi District da kaba pyntip lang ruh sha u Myntri ka tnad Bording, Chief Secretary ka jylla, sha u Myntri ka tnad Revenue,sha u Myntri Kampohïing bad ruh sha u CEO ka MeECL, ban pyntip ba ka tnad bording jong ka sorkar Assam ka la leit ban ai bording sha ki shnong kum ka Balakhawa, New Balakhawa bad bun kiwei ki shnong kiba hap ha Hima Nongspung.
Ha katei ka shithi, u Secretary ka Hima u la kdew ba ka jingleh jong ka sorkar Assam k along kumba pynkhreh ïa ka soskular ba la soi da u ADC ka Kamrup district, Assam bad u ADC ka Ri Bhoi, Bah PS Kharkongor, bad kumjuh u Secretary ka Hima Nongspung.”
Nalorkata, utei u MLA lyngba ka shithi, u la ong ruh ba ha u snem ba la dep, u Syiem ka Hima Nongspung,, kata ha ka shithi ba 29tarik Nailar, 2018 u la thoh sha u Myntri Rangbah ka Jylla, Conrad K Sangma, kumjuh sha u CEM ka KHADC bad ruh sha u SP ka Ri Bhoi ban kyrpad pynsangeh noh ïa ka jingtei ïa ka jingkieng ha Akhoinjira kaba don hajan Balakhawa, Nongspung Syiemship. La ong ruh ba shwa katei, ka Hima ka la thoh sha u DC Ri Bhoi ha ka 13tarik Nailar, 2018 hynrei um shym la lah ban pynsangeh ïa katei ka jingpyntrei.
Katei ka shithi ka ong ruh ba dei ha ka 5tarik Nailur, 2018, u DC ka Ri Bhoi u la thoh sha u DC ka Kamrup, Assam ryngkat ka jingkyrpad ba ka sorkar Assam kan sangeh noh ïa katei ka jingtrei ïa ka jingkieng bad surok ha Akhoinjira kaba don hajan Balakhawa, Nongpung Syiemship, Ri Bhoi da kaba ong ba ka don ka jingpynsangeh na ka Iing Bishar.
Ha kajuh ka por pat, haba kren halor ka jingdonkam ki kam pynroi ha katei ka thaiñ, u Bah SK Sunn u la ong ba naduh u 2010, ka Hima Nongspung ka la dep ban thoh sha u Myntri Kampohïing ka Jylla ban ai noh da ka Police Outpost ha New Balakhawa bad ruh ban pyntrei ïa ka surok kaba la dep ban sorbe naduh Patgoan, Bilpara, Ranibari, Akhoinjira, New Balakhawa, Bernongsai, Hawla haduh Baklapara.
Nalorkata, u ong ruh ba ka Hima ha ka 12tarik Jymmang, 2015 ka la thoh sha u Myntri ka tnad PWD bad ruh sha u Myntri ka tnad Kampohïing ka Jylla, halor ki jingeh ba ki 12 tylli ki shnong ki kynduh na ka daw ka jingbym don ki surok kiba biang bad la kyrpad ruh ïa ka sorkar Meghalaya ban kner lang ïa ki lad ai jingïarap namar ka Assam ka kloi ban ai ki kam pynroi hynrei ka pynap pat da ka buit ban kyntur pud.
U Bah Sunn u la ïathuh ruh ba hadien ka jingwan jurip ïa ka Balakhawa mardor hi u la phah ïa ka kaiphod sha u Myntri Rangbah ryngkat ka jingkyntu ba dei ban buh noh mardor da ka Police Outpost ha Balakhawa, kaba dei ka jingangnud kaba la slem bha ba ki paidbah katei ka thaiñ khappud jong ka Hima Nongspung ki la ap khmih lynti khnang ba kan long ka jingïada ïa ki na ka jingshah thombor kiba bunjait kiba ju wan na shilliang ka jylla.
Utei u MLA u la ong ruh ba ka jingshimkhia jong u, kadei namar ba ka Headquarter jong ka Hima Nongspung ka dei ha Nongspung kaba hap ha ka constituency jong u.
Lah ban kdew hangne, ba u Secretary ka Hima Nongspung, Bah Michael Warjri ha ka taiew ba la dep u la shah shoh ha ki paidbah ha Balakhawa ha kaba ki la pynjulor ruh ïa ka iingsah jong u bad thang ruh wat ïa ki kot ki sla ba donkam jong ka Hima. Ka jingkem jong ki pulit Assam ïa utei u rangbah hadien ba u la shah pynmynsaw ha ki paidbah ka pynlong ïa kiba bun ki seng kumjuh ka KHADC ban khihwin jur.