Press "Enter" to skip to content

Beh u Doktor ïa ki nongpang bym don um ka jaka sumar

Jowai, Jymmang, 16: Uwei u rangbah u la ujor sha ki ar tylli ki sengbhalang kiba kynthup ia ka All Jaintia Students ‘Union (AJSU) bad ka All Jaiñtia Hills Social Welfare Organisation (AJHSWO) ba ula shah beh na hospital Ummulong CHC ha ka por ba thiah pang lai ngut ki khun jong u. Une u rangbah u dei u ma H Suting, ba na ka shnong Ïongshiwiat kaba don thain Nartiang.
Une u rangbah ula ïathuh ba ha ka miet 14 tarik une u bnai lai ngut ki khun jong u ki la thiah ha Ummulong CHC, hynrei ki la shah beh ha u doktor ka Ummulong CHC ha katei hi ka miet bad la kynnoh ba u doktor ula kren tohmet ïa u.
Ula iathuh ba baroh ki nongpang ki la shah beh ha utei u Senior Medical Officer,
Ummulong CHC Dr. M Lamare ha katei ka miet bad ma u bad ki khun ki la mih na katei ka jaka sumar ha ka sngi kaba bud.
Ki nongialam sengbhalang kiba kynthup ia u PS Phawa Secretary AJSU bad u Ram Biam President AJHSWO bad ki dkhot ryngkat u ma Suting bad uwei na ki khun ba shitom ki la leit ban ia kynduh ia u doktor Lamare ha CHC Ummulong ha ka sngi Palei ban pan jingshai balei ba u kren tohmet bad beh ïa ki nongpang.
Na ka liang une u doktor M Lamare, u la ong ba um shym la beh ïa ki nongthiah pang, hynrei ka daw ka long namar ka jingbym don um ha kane ka CHC Ummulong bad ka la wanrah ïaka jingsma iwtung bym biang um ki painkhana. Ula kubur ba ula phah mih ïa ki nongpang bad ban leit phai sha ïing namarba ka rukom shitom ne pang jong ki nongpang ha katei ka miet ruh kam dei kaba jur bad lada ki dih tang da ka dawai kiba u la ai ruh kin ïoh ka koit ka khiah, ban ia kaba ki sah hangne kin ioh pang shuh shuh tang na ka daw ka jingsma iwtung ka asapatal.
U la ong ruh ka daw ka jingduh um ka dei namar ka jingbym don bording ban tan um ha katei ka sngi.
Haba kylli balei ym don kiwei ki lad ban pynbiang ïaka um bad bording, ula ong bad kane ka jaka sumar kam don pisa ban thied ne shim um nawei pat bad ïaka bording kim don da kiwei ki lad bad ki shu shaniah ha ka bordeing ka MeECL.
Na ka liang kine ki ar seng ki la dawa na ka tnad ka koit ka khiah ban biang ïa ki jingdonkam ki jaka sumar bad ym dei ban shu kren tohmet ïa ki nongpang kiba wan na ki shnong kiba jngai, hynrei ban pynbiang ïa ki lad ai jingshakri kaba pura.