Press "Enter" to skip to content

Halor ka jingkajïa pud : Yn kynduh u CM Meghalaya bad Assam ha u Jylliew

Shillong, Jymmang 16 : Ka jingmih ki kynram kynram dang shen ha Balakhawa, kan poi mynta sha ka jingkynduh lang hapdeng u Myntri Rangbah ka Meghalaya bad u Myntri Rangbah ka Assam kaba la buh ban long hadien ba la dep pynbna ïa ka result jong ka elekshon MP, kata hadien ka 23tarik u Jymmang.
“Ka jingkynduh lang hapdeng jong kitei ki Myntri Rangbah kan long hadien ka 23 tarik Jymmang, kata ha ka bynta ba nyngkong ne ba-ar jong u Jylliew,” u la ong da kaba bynrap ba ha katei ka jingïalang kin sa ïa kren sani bha khnang ba kum kitei ki jingjïa kin ym ïai jia biang hadien habud.
Shuh shuh u la ong ruh ba la bthah ïa Deputy Commissioner ban peitngor khnang ba kan don ka jingshong suk shongshgaiñ bad ruh ban ym don kino kino ki riew shimkabu.
Lah ban kdew hangne ba katei ka kynrum kynram ka mih kadei na ka jingshah shoh u Secretary ka Hima Nongspung Bah Michael Warjri, nangta ka jingshah thang lut ki kot ki sla ba donkam bad khamtam eh halor ka jingkem noh jong ki pulit Assam ïa u.
Da kaba ïathuh ba na ka liang u Myntri Rangbah kumjuh u Myntri Kampohïing ka Jylla ki la ïakren mardor bad u Myntri Rangbah ka Assam halor katei ka jingjia, na ka liang u Symbud Myntri Rangbah u la ong ruh ba ki pulit Assam ki la dei ban pyntip sha Meghalaya ha shwa ban kem ïano ïano na u pud u sam jong ka. “Lada ym dei hapdeng ki DC, ki lah ban leh hapdeng ki SP lane wat hapdeng ki Officer Incharge ruh (OC),” u la ong.
Nalorkata, u la ong ruh ba la bthah ïa ki Deputy Commissioner bad Superintendent of Police ka Ri Bhoi ba kin tohkit bad wad bniah halor katei ka jingjia bad ba kin phah ruh ïa ka kaiphod sha u Myntri Rangbah kumjuh sha u Myntri Kampohïing ka Jylla.
Haba pynshai pat halor ka jingong ba ka jingshah pynmynsaw u Bah Michael Warjri kadei namar ba u pyrshah jur ïa ka project shna surok jong ka Sorkar Assam ha Balakhawa, kaba wan na ka skhim PMGSY, u Symbud Myntri Rangbah u la ong ba ka jingpan jingbit jong ka sorkar Assam ban shna ïa ka surok hangtei ka pyni shai kdar ba ka Hima kadei ka trai jaka bad ba katei ka jaka ka hap ha Meghalaya.
Shuh shuh u ong ruh ba katkum ki kot ki sla, dei ka Hima Nongspung hi kaba ai ïa ka No Objection Certificate (NoC) ne ka jingbit ban shna ïa katei ka surok hangtei PMGSY ha katei ka jaka. Katkum ka jingong jong u, ka surok PMGSYkadei ka projek jong ka sorkar pdeng kumta kam don jingpher ei ei lada tei da ka sorkar jylla ne sorkar Assam namar ka jingmyntoi kadei hi na ka bynta ki paidbah nongshong shong shnong ha kito ki thaiñ khappud.
“Ïa ka surok PMGSY lah ban shna ym tang hapoh ka jylla hynrei wat ban pynïasoh ïa ki shnong na kawei ka jylla bad kawei pat na ka bynta ka jingmyntoi jong ki nongshong shnong,” u la ong.
Ha kane ka sngi, u Symbud Myntri Rangbah u la ïathuh ruh ba kane ka sorkar ka buh thong ban peit lang na ka bynta ka bit ka biang jong ki paidbah khappud. Katkum ka jingïathuh jong u, ka sorkar ka la mang haduh kumba 2,000 klur tyngka na ka bynta ki kam pynroi ha katei ka thaiñ.