Press "Enter" to skip to content

Ka 17th Edu-Options 2019 ka kabu na ka bynta ki samla pule

Shillong, Jymmang 16: Ka Edu-Options ba 17 kan sdang mynta ka sngi 17 tarik Jymmang 2019 ha All Saints Hall, Shillong na ka bynta ar sngi lynter ban kan kut ha ka 18 tarik. Ha kine ki ar sngi lynter ki skulbah ba paw eh jong ka ri India kin wan ban ïashimbynta na ka bynta ban ai ïa ka jingshakri sha ki samla pule jong kane ka nongbah kiba don jingmut ban bteng ïa ka jingpule jong ki shabar la ka jylla, khamtam lei kito kiba dang shu pass ïa ka Class XII.
Ha kane ka lympung ki samla pule kin lah ban ïakynduh da lade bad ki nongmihkhmat jong ki skul bah bapher bapher jong ka ri India ban ïasyllok bad ki bad ruh jied ïa ka jingpule kaba dei biang na ka bynta jong ki. Ha kane la lympung ki samla ki lah ruh ban ïoh ïa ki jingpynshai halor kiba bun ki bynta kiba lehse kim lah ban sngewthuh ne kim shai ha kaba ïadei bad ka jingpule bad ruh ki lad ïohkam hadien ba la pyndep ïa ka jingpule bapher bapher.
Kane ka Edu-Options ka long ka rynsan ha kaba ki samla pule kin shai kdar ha kaba ïadei bad ki jingpule kiba kham shalor lyngba jong ki Nongïasyllok bad ruh ki Nongmihkhmat jong ki skul bah bapher bapher, ha kajuh ka por kin ïoh ruh ban tip shaphang ki course, ki jingsiew, ki scholarship bad ruh ka jingthkna ka kam hadien bala pyndep ïa ka jingpule.
Ïa kane ka Edu-Options la pynlong da ka Lynchpin kawei na ka seng ba la paw bha ha kane ka thaiñ shatei lam mihngi jong ka ri India ban ai ïaka kabu ïa ki samla ba kin lah ban ïashem ïa baroh ki jingdonkam jong ki hapoh jong kawei ka tnum. Ha kane ka juk stad bad juk internet mynta, ka long kaba suk shibun ïa kiba bun ki samla ban shah ïalam bakla ha ki riew shim kabu, kumta haba ïadei bad ka jingim jong ki samla pule ka long kaba donkam ban phikir bha.
I Kong W. Lyngdoh iwei na ki nonghikai ka nongbah Shillong i la ban jur ïa ka jingdonkam ban don ïa kum kane ka lympung kum ka Edu-Option, khnang ba ki samla kin lait na ki jingshah shim kabu, hynrei kin ioh ïa ka lad ban kynduh markhmat bad ki bor pynaid jong ki college bad university. Mynta la 17 tylli ki snem ki paidbah ki la sha niah ha ka Lynchpin bad na ka liang jong ki nongpyniaid ki kular ban ai ïa ka jingshakri kaba bha tam sha ki.
Ki College bad ki Univesities ba pawnam jong ka ri ki ban wan ban ïashimbynta ha kane ka Edu-Options 2019 ban jer kyrteng kyndiat ki kynthup ïa ka SRM University Tamil Nadu, J.K Lakshmipat University (Rajasthan), Lovely Prefessional University (Punjab), Sharda University, NCR and Jain University (Bengaluru) bad kiwei pat. Mynshemsnem ruh bun ki college ba pawkhmat ka ri ki la wan ban iashimbynta bad la pdiang sngewbha ïa ki da ki samla pule bad ki kmie ki kpa jong kane ka nongbah Shillong.
“Nyngkong eh nga la tip shaphang kane ka Edu-Options haba u hynmen shynrang jong nga i wan ha u 2019 bad da ka jingshakri kaba la ïoh nangne mynta ki la dang bteng ia ka jingpule jong i ha Bangalore, kumjuh ma nga ruh ha kane ka kynti na khmih lynti ba ngan ïoh ïa ka college kaba janai eh na ka bynta jong nga” la ong i Nevana Khongngain, iba dang shu pyndep ia ka Class 12th mynta u snem.
U Director ka Lynchpin u Kaushik Barua, u la ong ba kane ka Edu-Options 17 ka plie bad khot sngewbha ïa baroh ki samla ban wan ban ïashimbynta bad u la ong ruh ba ka jingpule kaba kynsai ka dei ka hok jong iwei pa iwei, kumta kam don kano kano ka jingsiew ban wan bad ïashimbynta ha kane ka lympung hynrei ba kin ioh ïa ka jingmyntoi kaba pura kumba ki la khmihlynti.