Press "Enter" to skip to content

Khot ka jingïalang paidbah ha Nongstoiñ ban ïakhun tyngeh ïa u Drok

Nongstoiñ, Jymmang 15: Ka jingïalang paidbah hynne ka sngi hakhmat iew Nongstoiñ, ka khot ka wer sha ka jingïatreilang jong baroh naduh ki bor Nongsynshar, ki seng bapher bapher, ki longkmie longkpa, ki samla bad baroh kiba don ka jingkitkhlieh, ban ïakhun tyngeh ïa u Drok u ba la long mynta u Ksuid ba shyrkhei, u ba la teh mraw ïa kiba bun ki samla jong ka thaiñ bad ka District.
Ha kane ka jingïalang, baroh ki nongkren ki la pyn-shai bad pynpaw ha la ki jong ki nongrim ban pynsngew thuh paidbah halor ka jingsniew bad ki apot ki ban jia sha kito kiba la kum leit ktah ïa une u jingdih u ba pynjot thiaw ïa ka jingim jong u briew.
Kane ka prokram jingpynshai bad khot paidbah hynne ka sngi, ka dei kaba la khot pynlong da ka Khasi Student Union Nongstoiñ Circle bad la wan ban ïashim bynta lang da ki nongïalam jong ka Seng longkmie New Nong-stoiñ, na ka Social Welfare, na ka tnad ba dei peit ïa ka koit ka khiah, na ka liang ka tnad pulit, na ka liang ka Hima Nongstoiñ bad ruh na ki nongpynïaid jong ka Urban Mission.
Ha katei ka sngi ki nongkren ba kynthup ïa u bah A.S.Dohling jong ka Urban Mission, Bah Apsharai Syiem Secretary ka Hima Nongstoiñ, Bah T.S.Mawdoh Officer Incharge Anti Narcotic Cell, Kong A. Kharsyntiew Secretary Senglongkmie New Nongstoiñ, Kong M.L. Mawlot DMHP Civil Hospital bad Kong A.Kharbhih District Social Welfare Officer, ki la ban jur bha halor kane ka mat bad khot sha ka jingtreilang jong baroh. Bun ki la pynpaw ba ka jingdih bad pyndonkam ïa u drok, ka ktah ym tang ïa ka jinglong jong u briew hynrei ïa ka jingkoit jingkhiah ruh bad ka pynjynjar ïa kiba haïing hasem, ka shnong ka thaw bad ka imlang sahlang. Ki la pynshai ba kito kiba la kyrni ha kaba pyn-donkam ïa utei u jait jingdih, ka ktah beit ïa ka bor bor porkhat pyrdaiñ jong u briew .
Ki nongkren ki la kyntu ïa ki kmie ki kpa ba kin peitngor ïa ki khun ki kti jong ki bad ki dei ban bishar bniah ïa ka ïaid ka ïeng bad ka rukom leh jong ki, namar ba shisien ba ki khynnah ne ki samla ki la pyndonkam ïa drok, ki don ki dak kiba kham pher ha ka jinglong jong ki naduh ka kren ka khana bad ka jingleh ruh.
Kiba bun ki nongkren ki la kyntu ïa ki nongsynshar shnong, ki paidbah, ki seng longkmie, ki seng samla bad ki sengbhalang ba kin ïatreilang bad ki bor sorkar na ka bynta ban teh lakam ïa ki khun shnong khun thaw la ki dei ki khynnah, ki samla ne ki rangbah, ba kim dei ban shah ngop ha ka ban pyndonkam ïa utei u jait jingdih pynbuaid ba pynjot.