Press "Enter" to skip to content

Klumar thlim ki nongkhaïi dewïong ba ïoh Challan tang ki briew ba ïajan bad ki Myntri Sorkar

Jowai, Jymmang 16: Ki nongkhaïi dewiong na rilum Jaiñtia ki la klumar thlim hadien ba ïoh challan dewiong tang ar ngut ki briew ban challan ïa u dewiong uba la ailad ka Ïingbishar ba hakhliehduh ka Supreme Court ban shalan ïa u dewïong ba la dep tih lypa, uba don ba palat 75000 metric ton napoh ka Jylla bad kane ka jingailad kan long tang naduh lashai 17 tarik haduh ka 31 tarik Jymmang.
Ka Ïingkashari kala buh kyndon ïa ka Sorkar Jylla ba kan pynthikna ba ym dei shuh ban don ka jingshalan dewïong ne ka jingtih dewïong da kaba shim kabu na ka jingai jingbit ban shalan haduh 75050 metric ton bad kane ka jingai jingai jingbit ruh ka dei tang halor ki Challan bala dep ban ai.
Pynban ki nongkhaii bad ki sengbhalang bad ka kynthup ïa kaFKJGP, AJSU, HYC bad ka HSU ki la kynnoh bad ki la pynpaw ba ka don ka jinglehkhlieh shrieh bad leh shilliang khmat jong ka tnad DMR bad ka Sorkar Jylla ban ai Challan tang ïa ki ar ngut ki briew kaba haduh 35 hajar metric ton.
U Tuesday Lytep, President FKJGP Jaiñtia Hills ula ong bun ki nongkhaii kiba don lypa ïa kaChallan dewiong bad kiba la dep ban siew khajna kim shym la ïoh ban pynthymmai (renew) ïa ki Challan dewïong jong ki bad ki la pynpaw ka jingpyrshah kaba jur bad dawa na ka tnad DMR ban kan shimkhia ban pynbeit mardor ïa kane ka rukom ai shalan khnang ban ïa myntoi lang baroh u nongkhaii ym tang ki katto katne ngut.
Kine ki ar ngut kiba ïoh challan na ka DMR ki dei u Bison Shylla bad Tuifill Shadap na ka shnong Byndihati. La ong ba u Bison u dei u para jong u MLA ka Khliehriat bad u Myntri Sorkar.
Ki nongialam ka AJSU, HSU, HYC ba kynthup ïa u Pillar S Phawa, P Lamare bad u Kyrshan Rymbai ki la kynnoh ba kitei ar ngut ki briew kiba ioh ban pynthymmai ïa ki challan na ka bynta ka 35 hajar metric ton u dewïong kam dei satia na ka NGT list. Ka jingioh Challan kine ki arngut ka dei tang namar ba ki don ka jingiajan bad ki briew sorkar bad la kynnoh ba yn die rem dor pat sha ki paidbah nongkhaii.
Kine ki nongialam sengbhalang ki la pynpaw ba kin sa buddien bad buh ka jingkylli ïa kasorkar kumno kan leh ïa kiwei pat ki nongkhaii kiba don Challan don bad kiba don ha ka list jong ka NGT.
Na ka liang ki nongialam sengbhalang ki kyrpad ïa kasorkar ba kan ailad ia ki padibah ban pynthymmai iaki challan bad kam dei ban leh khliehshrieh bad ki la byrthen ruh ban kiew ïinglieh ïingsaw lada ym ïoh ban pynthmmai ïa ki Challan kiba ki la dep ban siew khajna.