Press "Enter" to skip to content

Kular u CM ban maramot ïa ka ïing u Secy ka Hima Nongspung

Shillong, Jymmang, 16: Ka Sorkar Jylla ka la kular ban maramot biang ïa ka iingsah jong u Secretary ka Hima Nongspung u Bah Michael Warjri kaba la shah pynjulor ha ki paidbhur ha ka 7 tarik mynta u bnai ha ka shnong New Balakhawa, kaba hap ha Ribhoi District.
U Myntri Rangbah ka Jylla, u Conrad K. Sangma ha ka jingïakren bad ki lad pathai khubor hadien ba la wai ka jingïalang bad ki MDC ka Khasi Hills Autonomous District Council (KHADC) ba ïalam da u Chief Executive Member (CEM) u Bah Teiñwell Dkhar, u la ong, “na ka liang ka Sorkar kan sa ïarap ban pynshna ïa ka ing jong u Bah Michael kaba la shah pynjulor ha ka shnong New Balakhawa.”
U la ong ruh ba ka Sorkar Jylla ka la shimkhia bha ïa kane ka jingshah thombor une u Secretary ka Hima Nongspung bad ïathuh ruh ba kane ka jingïalang kaba la long mynta ka sngi bad ki MDC ka KHADC la ïakren sani ruh na ka bynta ban phah ïa ki pyrton pulit sha ka shnong New Balakhawa.
“Ngi la ïakren sani halor ka shongsuk shongsaiñ bad ban phah ïa ki pyrton pulit ki ban pahara ha katei ka jaka khnang ban khanglad ïa kino kino ki jingïakynad kiba lah ban mih hadien habud,” u la ong.
U la ïathuh ruh ba dang shen u MLA ka Jirang Constituency, u Bah Sosthenes Sohtun, dang shen u la ïakynduh ïa u Myntri ka tnat Kam Pohing ka Sorkar Jylla, u James K. Sangma ban pynsngew halor ka jingdonkam ban buh noh ïa ka Police Outpost ha ka shnong New Balakhawa na ka bynta ban ïada ïa ki paidbah kiba sah ha ka khappud jong ka Jylla Assam.
“Ngin sa lah ban leh ïa kane tad ynda ladep shwa ka jingjurip kaba bniah,” ong u Conrad Sangma.
U la ïathuh ruh shen un sa leit ïakynduh ïa u Myntri Rangbah ka Jylla Assam u Sarbananda Sonowal ban ïakren halor ka jingshah thombor u Bah Michael kaba dang shen.
“Naduh ka sngi ba la khie kato ka jingjia, u Myntri Rangbah ka Assam bad ma nga ngi la ïakren sani bha bad ngi la shim ruh ïa ki lad ki lynti ban wanrah ïa ka shongsuk shongsaiñ ha ki shnong khappud bad ngim kwah ba kino kino ki jingïakynad kin dang ïai jia ha ki sngi ki ban sa wan,” ong u Conrad.
U CEM ka KHADC, u Bah Teiñwell Dkhar haba bynrap halor kane, u la ong, “ngi la kyrpad ïa ka Sorkar Jylla ba kan shimkhia ban wanrah lut ïa baroh ki mukotduma kiba la register pyrshah ïa u Bah Michael na Assam sha Meghalaya.”
U Bah Titostarwell Chyne u la ïathuh ba ka Sorkar Jylla kan sa shimkhia ban shna biang ïa ka iingsah jong u Bah Michael.
“U Myntri Rangbah u la pynpaw ruh ka jingsngewnguh ïa u Bah Michael uba la ieng ehrang ban ïada ïa u pud u sam watla u sah tang marwei ha ka shnong New Balakhawa” ong u Bah Titos bad bynrap, “u Myntri Rangbah u la kular ruh ba ka khyndew na Meghalaya kam dei ban leit wat tang shi inshi ruh sha kawei pat ka jylla (Assam).”
U la ïathuh ba ki MDC ki la ai jingmut ïa ka Sorkar Jylla ba ka dei ban ailad ïa ki briew kiba sah ha khappud ba kin rejistar ïa ka jaka khlem da siew pisa.
“Ngi la ai jingmut ïa u Myntri Rangbah ba ka Sorkar ka dei ban shim ïa ka rai ba la kumno ka dei ban ailad ïa ki briew kiba sah ha khappud ba kin rejistar ei ïa ka jaka da kaba leh ruh ïa ka jingjurip ba pynshisha (spot verifation),” u la bynrap.
Ha ka dorkhas ba u CEM ka KHADC u la aiti ha u Conrad Sangma ka la dawa ba ka Sorkar ka dei ban pynsangeh noh mardor ïa ka jingshna surok PMGSY ka Sorkar Assam hapoh u pud u sam ka Meghalaya ha ka shnong New Balakhawa, Ribhoi District.