Press "Enter" to skip to content

Palat 100 ngut la ïap ki briew ha Cardio Dept naduh u 2018: Director NEIGRIHMS

Ka tiar ba 25 lak ym shym la pyndonkam ha kane ka tnad sumar

Shillong: Wat haba ka sorkar pdeng ka dang ap ïa ka kaiphod kaba bniah haba ïadei bad ka jingïap pang klongsnam i longkmie na Mawphlang ha NEIGRIHMS, u Director jong kane ka Institute, da kaba kdew ia ki jingkheiñ na ka Medical Records Department, u Director, u la ong naduh u Kyllalyngkot 2018, palat 100 ngut ki briew ki ïap ha ka Tnad Cardiology na kaba kum kajuh ka jingpang ne kaba ïasyriem, hynrei ka long kaba sngewsih ba don ki briew da ka jingthmu ba sha lyndet jong ki, ki la ïalam bakla ïa ki paidbah halor ka jingïap ine i longkmie na ki daw ki bym lah ban tip.
Ha ka kyrwoh ba la phah lyngba u PRO jong kane ka Hospital, la ong ba u Director u la pynpaw da kaba ong ba kano kano ka jingiap ka dei ka jingjia ba sngewsih, bad kum u khlieh jong ka Institution, ka dei ka jingkitkhlieh jong u ban pyntikna ba uno uno u nongpang un ym ïap, ïa uba lah ban pynkoit. Hynrei kaba sngewsih ka long ba don ki briew namar ka jingthmu ba sha lyndet ki ïalam bakla ïa ki briew, bad u la ong ba kum kane kam dei ban jia satia.
“Namarkata, ka long ka bym sngewtynnad ba don ki briew ki pynheh ïa ka jingkhlad noh jong ine i nongpang na ki daw bym tip”, la ong u Director.
Shuh shuh, u Director, u la ong, ba ka tiar kaba shongdor kumba 25 lak ïa kaba la pan da ka Tnad Cardiology ym pat ju pyndonkam mynno mynno ruh da kane ka Tnad, wat lada bun ki nongpang ki la khlad noh na ka juh ka jingpang ha ki por ba mynshwa. U la pynshai ruh ba bun na ki dawai bad ki jingdonkam la ai khlem donkam siew sha ki nongpang kiba duk, hynrei ïa katto katne ki tiar kiba kham rem dor ki nongpang ki donkam ban thied. “Ki jingpyrshang jong ngi ki long ban pynthikna ba ki nongpang kin thied ia ki tiar ha ka dor kaba duna tam, khnang ba ki nongpang kiba duk jong ka thaiñ kim donkam ban die ïa ki jingdon jingem bad ïa ka khyndew jong ki na ka bynta ban ïoh ïa ka jingsumar”, u la ong.
Ha kaba ïadei bad ka Amrit Pharmacy ba la buh hapoh ka Institute, u khlieh duh kane ka Institite, u la ïathuh ba la sdang ha u snem 2016 bad tang kawei ka jingthmu ban pynïoh ïa ki dawai bad ki tiar sha ki nongpang ha ka dor kaba biang. U Director u ai jingkhublei ruh ïa ki Faculty ka NEIGRIHMS ha kane ka por da kaba ong ba u la ïoh ïa ka jingiatreilang jong jan baroh ki Faculty ha kane ka liang. U la kular ba un dang ïai bteng ïa ki jingpyrshang jong u ban pynbeit pynryntih ïa ka rukom treikam khnang ba kan long kaba sngewtynnad ïa ki nongpang bad ïa ki nongtrei ruh kumjuh.
Lyngba kane ka kyrwoh, u Director, u ong ba ha ka sngi Palei, u la pynpaw sha ki Faculty ïa ka jingpdiang ka tnad ka Koit ka Khiah jong ka Sokar India ban pyntreikam noh man ka por ïa ka Assessment Promotion Scheme ha NEIGRIHMS naduh mynta u snem. Katkum ka shithi ha ka 2 tarik u Jymmang, 2019 ïa ki form na ka bynta ka Assessment Promotion Scheme yn khot man u snem ha u bnai Jymmang bad baroh ki Faculty kiba kotïia ki kyndon ba lah buh ki lah ban kiew kyrdan kiba kham hajrong. U la ai jingmut ruh ïa ki Faculty ban trei hok katkum ka jinglah jong ki khnang ba ka jingshaniah jong ki nongpang jong kane ka thaiñ kan neh ha kane ka Institute.