Press "Enter" to skip to content

Rai ka sorkar ban thaw da ka Farmer’s Commission kyrpang ïa ki nongrep

Shillong, Jymmang 16 : Ka sorkar jylla ha ka sngi Palei ka la rai ban thaw noh da ka Farmer’s Commission kaban peit kyrpang ïa ka bha ka miat bad ki jingeh ba ki nongrep ka jylla ki kynduh na ka por sha ka por.
Haba kren bad ki lad pathai khubor hadien ka jingïalang jong ka kynhun Myntri, u Symbud Myntri Rangbah ka Jylla, Bah Prestone Tynsong u la ong, “Ka kynhuh Myntri ka la mynjur ïa ka jingtyrwa jong ka tnad ka Rep ka Riang ban don noh da ka Farmer’s Commission kaba long katkum ka rai ba la mih ha ka Farmers’ Parliament.”
Nalorkata, u ong ruh lyngba ka Commission, ki nongrep kin sa ïoh ruh ïa ki jinghikai bad ki jingshai haba halor kiba bun ki bynta namar kin don ruh ki riewshemphang na kylleng ka ri Indïa kiban wan. Katkum ka jingong jong u, ka sorkar jylla lyngba ki jingai jingmut kiba wan na ka Commission, kan sa lah pat ban ïarap ïa ki.
Shwa kane, u Symbud Myntri Rangbah u la ïathuh ruh ba ha u snem ba la dep, ka jylla ka la ïoh ban pynlong ïa ka Farmer’s Parliament kaba nyngkong eh naduh ba ïoh la ka jong ka jylla ha kaba u Myntri Rangbah hi u leit ban plie ïa ka.
U la ong ruh ba dei ha katei ka lympung kaba heh bha jong ki nongrep ba ka la mih ka rai ban kyrpad ïa ka sorkar ba kan thaw noh da ka Farmer’s Commission.
“Ka la mih ruh ka jingdawa ba donkam shisnem ban ban pynbna kum u snem jong ki nongrep hynrei namar ba la dier ka por, lehse ngi lah ban leh noh ha u 2020,” u la bynrap shuh shuh.
Ïa mynta hi, u Bah Prestone u la ong ruh ba ka kynhun Myntri kala bthah ïa ka tnad ka Rep ka Riang ba kan thaw noh ïa ki Rules. La ïathuh ruh ba ki dkhot ha ka Commission kin kynthup naduh ki riewshemphang ha ka rep ka riang bad ruh na ka liang ki nongrep.