Press "Enter" to skip to content

Siat ïap ka HNLC ïa u Bah Romeo namar ki kam pisa, ong ki Pulit

Kyntait ba dei u Nongsyntiat jong ki

Shillong: Ki Pulit ka jylla ki la kyntait ba u Bah Romeo Lyngdoh, uba la shah siat ïap ha ka HNLC ha ka meit Sngi U Blei, u dei u nongsyntiat ki Pulit, hynrei ki la kynnoh ba u dei u briew jong ka Seng hi.
Ka SP jong ka East Khasi Hills, ka Kong Claudia Lyngwa, ka la ong ba u Bah Romeo u dei uba ju ïadon kti bad ka HNLC, ha kaba pynbiang ïa ka leit ka wan bad khamtam ban lum pisa na ka bynta jong ki. Hynrei haba u leh shalak ïa ka pisa ba u lum bad um ju pynpoi bha shuh sha ki, ka HNLC ka la shim noh ïa ka jingim jong u.
Haba ïakren bad ki nongthoh khubor ha ka sngi Palei, ka Kong Claudia, ka la ong ha u snem 2016, ki Pulit ki la ïoh bat ïa kali jong u, kaba la kit ïa ki tiar siat jong ka HNLC. Hynrei ha katei ka por u la aidaw ba um don jingtip eiei, hynrei dei ka jinglehhi u draibar jong u.
Pynban na ka jingtip ki Pulit la shem ba udei nongkyrshan jong ki da kaba pynbiang ïa ki kam lum pisa na ka bynta jong ki. “Une u rangbah na ka pisa ba u lum u la pyndonkham kham bun ïalade bad khyndiat u ai sha ka Seng HNLC mynta la kumba shi snem eiei bad dei kane kaba la pynlong ïa ki ban siat ïap noh ïa u”, la ong ka SP.
Halor ka jingkam ka HNLC ba la thwet ïa u la lai snem, ka Kong Claudia, ka la pynpaw ka jingsngew sam mut ba ha i shnong Lapalang, ka jingbun briew kan long kumba lai spah ngut eiei, ka HNLC kam lap ïa une u briew, nalor ba u dei uba la pawnam bha ha katei ka thaiñ. “Ka long ka bym lah ngeit ba kane ka Seng kam lap ïa u ha kine ki lai snem ba ka thwet”, ka la ong, da kaba bynrap ruh ba ka HNLC ka don ruh ïa u dkhot ba la kham rangbah ha ka Seng uba dei na Lapalang, uba kyrteng u Donboklang ba ju sin ïa u, u Palang rwai, namar ba u tbit ha ban rwai.
Ka la ïathuh ba ha ka miet ba u shah siat, ki dkhot ki la pyrta ïa u da ka kyrteng sin Bahlieh, kaba dei ka kyrteng ba ki ïa tip ha Shnong. “Phi lah ban mut dur, ba ha ka por miet, u briew un shu plie ïa ka ïing bad mih shabar, lada don ba khot khlem da tip dei mano?” ka la ong. Ka la kyntait ruh ba ka HNLC ka don ki Hit list ha ka thup jong ki da kaba ong ba kane kadei tang ka kam pyntieng pynsmiej, namar ba kane ka Seng ka la tlot bha mynta, ha kaba ki dkhot kin don kai tang kumba 14 ne 15 ngut. “Ki lah ban pyntieng kai ïa kiba rit b aria, hynrei kim nud pat ban ïakhun bad ki Pulit,” ka la ong.