Press "Enter" to skip to content

Weng noh ïa ka bhah ST na ki riewlum bym dei na Meghalaya, dawa ka SNSNP na u CM

Shillong, Jymmang 16 : Ka Synjuk ki Nongsynshar Shnong ka Nongthymmai Pyllun ha ka sngi Palei ka la dawa na u Myntri Rangbah ka Jylla, Conrad K Sangma ba dei ban weng lut ïa ka thup jong ki jaidbynriew riewlum (Scheduled Tribe) kiba dei na kiwei pat ki jylla ka thaiñ shatei lam-mihngi jong ka ri khnang ba kin ym lah shuh ban knieh lang ïa ka hok jong ki jaidbynriew riewlum kiba dei na Meghalaya.
Da kaba kyntu ruh ïa ka sorkar jylla ban ïa kren ruh bad ka sorkar pdeng khnang ba yn lah ban pynkylla noh ïa ka thup jong ki riewlum (Scheduled Tribes/Castes) ha ka Presidential Order, na ka liang ka Synjuk ki kyntu ïa u Myntri Rangbah ba la donkam ban leh kyrkieh halor katei ka bynta.
Haba kren bad ki lad pathai khubor hadien ka jingkynduh ïa u Myntri Rangbah ha ïingsah jong u, u president ka Synjuk, Bah Bantylli Nari u la ong ba katkum ki jingtip, ka Meghalaya naduh ba ka ïoh la ka jong ka jylla ka la shu shim bad pyndonkam beit da kajuh ka thup riewlum jong ka Assam ha kaba, baroh ki riewlum na ka thaiñ kiba la ïoh ïa ka jingithuh naduh katei ka por ki ïoh jaka lang ha ka thup jong ka Meghalaya ruh.
“La donkam ban pynkylla thymmai ïa ka Presidential Order (Scheduled Tribe) 1950 namarba ka Meghalaya wat hadien ba ka la ïoh la ka jong ka jylla mynta la 46 snem kam pat pynkylla shisien ruh ïa katei ka thup kyrteng ki riewlum kiba ka la kaba ka shu bud na ma Assam,” u la ong.
Katkum ka jingong jong u, kiwei ki jylla jong ka thaiñ shatei lam-mihngi jong ka Ri mar ïa ïoh la ka jong ka jylla ki ju pynsngew ïa ka sorkar pdeng ba ka dei ban pynbeit noh ïa katei ka Presidential Order hynrei ïa kane ka bynta ym pat leh satia ha Meghalaya.
Da kaba kdew ba ki don haduh 17 tylli ki Jaidbynriew riewlum (Scheduled Tribe) ha ka jylla, u Bah Nari u la ong ruh ba tang ki jaidbynriew Kuki marwei ki don pat haduh 37 kynhun ne sub-tribe. “Ka thup jong ki ST ha ka Presidential Order ba shim bad pyntreikam da ka Meghalaya ka long kulmar bha namar don ki riewlum ki bym dei satïa ki nongshong shnong ba pura jong ka jylla hynrei kidei ba poi na kiwei pat ki jylla.”
Shuh shuh u ong ruh ba ka jingïoh rung jong kiba bun ki kynhun riewlum ha ka thup ki ST ka la pynlong ïa kiba bun ki hok jong ki trai nongshong shnong ka jylla la ka long ha ka ïohkam ïohjam, khaii pateng bad kynthup ha ka rukom bat ïa ka jaka puta. Dei halor kitei ki nongrim ba ka Synjuk ka dawa jur na u Myntri Rangbah ba u dei ban shimkhia ban weng noh ïa kiwei pat ki riewlum ki bym dei ki nongshong shnong ka jylla na katei ka thup.
“Ngi kwah ba ka sorkar jylla kan bishar bniah ïa katei ka Act namar kum ha Sikkim bad ruh ha Nagaland naduh ba ki pyntreikam ïa ka, ki la weng lut ïa kiwei pat ki jaidbynriew riewlum na ka thup Riewlum ki bym dei na ki jylla jong ki,” u la ong da kaba bynrap ba ha Meghalaya pat ki riewlum na kiwei pat ki jylla ki ïoh beit ïa ki jingmyntoi katba kiba nangne pat lada ki leit shabar ym don satia ba ithuh.
U la ong ruh ba bun ki riewlum na kiwei pat ki jaidbynriew kiba don ha katei ka thup ki ïoh lang ïa ka bhah riewlum kumba ïoh ki trai shnong ka jylla. “Kim donkam ruh wat ban aplai Trading lane Labour License na ka Khasi Hills Autonomous District Council (KHADC),” la bynrap biang u President.
Na ka liang u Secretary ka Synjuk, Bah Bawan Khyriem, u la ïathuh ba Supreme Court ka Ri ha ka hukum kaba 30 tarik u Nailar ka la ong ba u no uno u briew uba dei u Schedule Tribe ne Schedule Caste ha kano kano ka jylla kin ym ïoh ïa ka hok long SC/ST ha kiwei pat ki jylla kiba u leit shong ban pule ne ban trei.
Na ka liang ka Synjuk ki la ïathuh ruh ba ha katei ka jingkynduh, na ka liang u Myntri Rangbah u la kular ban bishar bniah bad ban sa khot biang ïa ki ban ïa syllok halor katei ka mat jing dawa.
Na ka liang ka Synjuk hi ka kren shai ba kim kwah ba kiwei pat ki riewlum ki bym dei ki trai muluk ka Meghalaya ba kin ïoh jaka ha katei ka thup jong ki riewlum ka Jylla.