Press "Enter" to skip to content

Jop ka Mawkohphet SC ha ka jingplie ïa ka Alliance T20 Cricket Tournament ha Domjyrti

Mawkyrwat, Jymmang 17: Ka Mawkohphet Sports Club ka la ioh ïa ka jingjop ha ka jingsdang ïa ka Alliance T20 Cricket Tournament 2019 kaba la long mynnin ka sngi ha Pyndenmukhong Dom-jyrti ïa kane ka lympung ïalehkai la pynlong da Iakynton Welfare Organi-sation ha ryngkat ka jing-ïatreilang bad ka Domjyrti Sports Club ha kaba 16 tylli ki kynhun na ka thaiñ Mawkyrwat ki la wan ban ïashim bynta.
Ka jingïalehkai ka la long hapdeng ka Mawkohphet Sports Club pyrshah ïa ka Pyrshang XI ha kaba ka Pyrshang XI ka tied nyngkong bad buh thong 78 ron na ki 17.2 ober bad hap noh baroh 10 tylli ki wikets. Ki nong kawang bol ka Mawkohphet SC ki ba la ïalehkai bha ki long u Wiseman K. Syiemiong bad u Golden K. Syiemiong bad khur mar 3 wiket marwei. Ka Mawkohphet SC kaba la beh ïa ka thong ka la lah ban pyndep tang hapoh 10 ober ka la tied 79 bad hap tang 3 wiket U nongkawangbol jong ka Pyrshang XI u Stainer Lyngdoh u la lah ban khur 2 wiket.
Ïa kane ka Tournament la ioh ban plie pyrda da u bah Kloiland Wanniang, J.E PWD na Mawkyrwat uba dei ruh u rangbah ba ju trei ïa ki kam treimon sngewbha ha ka imlang sahlang, ha ryngkat ka jingïadon lang u bah Bakhaiñbor Nongsiej, Secretary SWKHDCA, bah Kitborlin Lyngdoh, bah Customer Nongsiej, ki nongïalam jong ka Domjyrti Sports Club, ki riewrangbah bad ki dkhot jong ka synjuk.