Press "Enter" to skip to content

Khur takma rupa bad rnong ki khynnah ïalehkai taekwando ka MTTS

Shillong, Jymmang 18 : Ki khynnah ïalehkai taekwando ka Meghalaya taekwando Training School, Sunny Hills Shillong ki la ioh ba kin khur ar tylli ki takma ba kynthuip kawei ka takma rupa bad kawei ka tkam rnong ha ka jingleit aireng ka jong ki sha ka rynsan ïalehkai 1st Surju Tamang Memorial Taek-wando Championship 2019, ba la long ha ka 3 bad ka 4 tarik mynta u bnai Jymmang ha Laban Indoor Stadium.
Ki kyrteng jong ki khynnah ka MTTS ba la ioh ban khur ïa kine ki takma ki long Nathan Oswin Tiewsoh ba pule ha Govt Boys Higher Secondary School Jaiaw ba la ioh ban khur ïa ka takma rupa bad Sankurpar Reenborn ba pule ha St Dominic Higher Secondary School, Mawkhar ba la ioh ban khur ïa ka takma rnong.
Na ka liang ka MTTS ka ai khublei ïa kine ki arngut ki khynnah halor ka jinglah ban wanrah ka jong ki ïa ka nam ka burom ia ka dong ka thaiñ bad ïa ka MTTS Sunny Hills Shillong. Ka MTTS ka kyntu bad ai mynsiem ïa kine ki arngut ba kin nang trei shitom bad kiew shaphrang bad kumjuh ha ka jingpule ka jong ki.
Kane ka long kat kum ka kyrwoh ba la phah da u bah Donbor Lyngdoh Chief Instructor MTTS, Sunny Hills, Shillong.