Press "Enter" to skip to content

Ki Khun Ka Bri U Hynñiewtrep ïano Ngin Jied ïa U Blei Ne ïa U Soitan

(Rev.P.W.L. Marweiñ)
Paradoh-Parasnam ka Bri U Hynñiewtrep lada ngin jied ïa U Blei ngi dei ban tip uei U Blei? bad lada ngin jied ïa u Soitan ngi dei ban tip uei u Soitan? Ngin jied ïa U Blei- U Blei u long uba bha uba don ka jingieit, ka jingshisha bad ka jingkhuid ne ka jingjanai U Jisu Khrist Uba U Trai haba u dang don ha kane ka pyrthei U la ong ha ki paidbah kiba wan sngap ïa ka jingïalap jong u halor u Lum, To long phi kiba janai kumba U Blei U kpa jong phi uba ha bneng u long uba janai. U Blei u kwah ia ngi ki briew kiba tip ïa kaba bha bad ïa kaba sniew kum U Blei ba ngin long kum u Immanuel uba long U Jisu Khrist u khun U Blei uba bam ia ka makhon bad ka ngap, kaba u tip ban kyntait ïa kaba sniew bad ba u tip ban jied ïa kaba bha (Isaiah.7:14-15;Mathaios 1:21-23; Mathaios 16:16; Jenesis 3:22). Ka Proberb ka ong, Ki khmat U Blei U Trai ki long ha ki jaka baroh; u da ap khmih ïa kaba bha bad kaba sniew (Prob 15:3). U Isaiah u la ong, Kordit ïa kiba khot kaba bha ïa kaba sniew bad kaba sniew ïa kaba bha – (Isaiah 5:20). Lada ngin jied ïa kaba bha kaba mut ïa U Blei to ngin kyntait ban pyrkhat ïa kaba sniew, ban kren ïa kaba sniew, ban thok ban shukor, hynrei ban kren ban leh ïa kaba bha, ba shisha bad ba janai, ban kyntait ïa ka bam ka dih buaid, ïadrod, ban kyntait ïa ka ïania-ïa aw, ïashoh, ïadat, ïa pynïap, ban kyntait ïa ki kam awria, kam klim, kam ïaleh beijot-be-aiñ ïa ki kynthei khynnah, ban kyntait ïa ki kam tuh, kam pynbamsap bad bamsap kiba pynsniew pynpyut pyniwtung, pynjakhlia, kaba pynjot kaba pynkhleh jaktung kaba pynduh noh ïa ka jinglong nylla ka mynsiem kaba long ka sharak
U Blei ba lah ban ïit ïa ki bynta ba shapoh ka kpoh. (Prob.20:20 bad kaba pynhiar dor ïa u briew. Ka ktien U Blei ka ong, Ka nam kaba bha ka kham dei ban jied ban ïa ka spah kaba khraw. Ngin kyntait ïa ka jingkwah eh ban riewspah, hynrei ngin sngewhun tang ha kaba ïoh jingbam bad jingkup; namar ngim shym la wallam ei ei bad ngim lah ruh ban rah ei ei, namar u thied jong ki kynja ba sniew baroh long kaba ieit sbai/spah ïa kaba don haba ki beh eh, la ïalam bakla ïa ki na ka jingngeit, bad la dung ïa ki hi da kiba bun ki jingsngewsih (1 Timothi 6:7-10). Ngin jied ia u Soitan- U Soitan u long uba sniew, uba bymman, u long u angel uba la hap noh bad u Blei ula pynrem ïa u bad u la ïoh ïa ka jingbymman ka bym lah shuh ban map bad ka jingkut jong u bad ki kynhun angel bymman jong u kan long ka dujok ding. Ka kam u Soitan/u bymman bad ki angel jong u ha kane ka pyrthei ka long ban pynshoi ïa ngi ki briew ban kyntait ïa kaba bha bad ban jied ïa kaba sniew. Lada ngi la pdiang ne la jied ïa u soitan bad ki angel jong u kin rung ha ka mynsiem /ka dohnud jong ngi; kin pynsniew, pynpyut pyniwtung ïa ka mynsiem jong ngi.
Ngin long ki khun u Soitan /u bymman kum u soitan ngin mut ngin pyrkhat, ngin kren ngin leh ïa ki kam bymman u soitan. Ngin kren sih-tim-sih, ngin thok-ngin shukor, ngin ïania-ïa aw, ïashoh -ïadat ngin ïa pynïap, ngin ïa bishni ngin ïa pynjot uwei ïa uwei pat ngin ïa bam ïa dih buaid, ngin ïa ïaid -ïaleh awria, ngin ïaleh nuti, ngin ïa klim ruh, ngin ïaleh beijot be-aiñ ïa ki kynthei- khynnah, ngin ïa tuh, ngin ïa pynbamsap, ngin ïa bamsap, ngin ïa pynheh ïa ki maw kilo bad ki dieng thew bad ngin pynrit ïa ka dor haba thew ban ïoh nong bad ngin pynrit ïa ki maw kilo , ki dieng thew bad ngi ki Sahep niam bad ki Sahep pyrthei ha ki shuki ngin ïa khmih khnang haba leh ïa kaei kaei na ka bynta u baduk basuk tang ïa ka bainong (reward) bad ïa ki jingai sngewbha (gifs). Ngi ki paidbah bymman ngin pyrkhat tang ki jingai sngewbha (gifts) sha ngi ki Sahep bymman ba kin leh ïa ki jingkwah jong ngi. Lada kim leh, ngin tim bad lada ki leh ngin ïaroh ïa ki.
Nga ai jingmut ïa ngi khun ka Bri U Hynñiewtrep, ka jaidbynriew tipBlei tipbriew, ba ngin ai ka jingïaroh ïa U Blei ba u la pynlah ïa ki briew ban sheptieng ia ki ba kin jied ïa kaba bha bad ki ïalap ïa kiba bha ha ki paradoh parasnam ka Bri U Hynñiewtrep ba kin ioh shong ha ïing U Blei ha kata ka ri phyrnai ha bneng ha kaba ijli kan lah ban bsut hangta. Nga ai jingmut ïa ngi ki khun ka Bri U Hynñiewtrep , kiba tipBlei -tipBriew ba ngi dei ban tim ban kynnoh ïa u soitan uba long u bymman uba long u nongshun jong u Blei bad u briew uba la pynlong ïa ngi ba ngin jied u Soitan ban leh ïa kine ki kam bymman- ha kane ka Bri U Hynniewtrep. Une u bymman/u soitan bad ki angel bymman (demons) jong u ki trei shitom bha ban pynshoi ia ngi ki khun ka Bri U Hynniewtrep bad ia kiwei pat ki jaidbynriew ka pyrthei ba kin kyntait ïa kaba bha/ U Blei, ba kin jied ïa kaba sniew/ u soitan ba kin long ki angel bymman jong u ban pynshoi ïa kiwei pat ia kiba bha ban wan sha ka kynhun (party) jong u ba kin ïa leit lang bad u lem bad ki angel bymman jong u sha kata ka dujok ding ba u Blei u la khreh ïa u bad ki bymman, ba u ksain jong ki um ju ïap bad ka ding jong ki kam ju lip ban pynjynjar ïa ki mynsiem jong ki shi junom bhor.
Ka khubor ba bha U Blei ka khot ïa kiba bha to nang leh bha bad ïa kiba bymman to kylla bamut na ki kam bymman to ngeit ha U Blei u kpa jong ngi uba ha bneng bad ha U Jisu Khrist U Trai uba long u Khun U Blei uba la wan khnang sha kane ka pyrthei ba u la pynmih ïa ka snam Blei jong u halor ka diengphna ha u Lum Kalbari, ba la tip ïa u; u la mih pat na ka jingtep, uba la kiew sha bneng, uba la shong ha ka kti kamon ka khet U Blei ha bneng uba la seng ïa ka Balang Khristan jong u ha ka sngi Pentekos ha Jerusalem ha ki snem 30 H.K. da kaba u la pynbaptis da u Mynsiem Bakhuid U Blei uba la shong sah ha u ha ki 120 ngut ki synran jong u. Ka Balang Khristan U Jisu Khrist U Trai mynta ka la man long ka Jaidbynriew jong ka pyrthei.
Ki khun ka Bri U Hynniewtrep bad ki Jaidbynriew ka pyrthei kiba sngewthuh ba ki la shah khum shah teh ha u bymman/soitan kin wan sha ka Balang Khristan kaba long ka Balang ne ka Seng U Blei ha u Jisu Khrist uba U Trai da ka bor u Mynsiem Bakhuid U Blei uba la shong sah ha u, un beh noh ïa u soitan/u bymman na ka dohnud.ka mynsiem jong ki bad u Mynsiem Bakhuid un sait da ka snam UJisu Khrist uba U Trai ia ki dohnud/ ki mynsiem jong ki ba la pynsniew ba la p ynpyut, ba la pynbit jakhlia da ka pop/ka bymman bad u soitan ba kin khuid bad U Blei U Kpa bad U Jisu Khrist Uba U Trai ha U Mynsiem Bakhuid un shong khet ha ki mynsiem ki briew, kin long ki jingthaw ba thymmai, bad kin sa ijli ïa kito ki kam bymman ba ki la leh mynshuwa bad kim kwah shuh tang ban kynmaw ïa ki. Ko khun ka Bri U Hynñiewtrep to ngin pyrkhat bha ïano phin jied ïa kaba bha /U Blei ne ïa kaba sniew/ u soitan?
U Jisu Khrist uba U Trai ha bneng, u ong ha u Ioanis uta uba leh bym hok to un nangleh bym hok, uba leh tngit un nangleh tngit, uta uba leh hok to un nang leh hok bad uba leh khuid un nang lehkhuid, ha khmih nga wan kloi, nga don ka nongban ai ha uwei uwei baroh katkum ka jingleh jong u (JPW 22:11-12)- Kane ka jingong ka thew ïa ka sngi ka jingwai noh ka pyrthei ba U Blei u la buh ïa u Jisu Khrist Uba U Trai ba un long u Nongpynim ïa ki briew na ka jingpynshitom U soitan, ïa ki briew met bad mynsiem bad u la thung ïa u ba un bishar ïa ba im bad ïap kumjuh ha kata ka sngi bishar (Kam Apostol 10:38-40). Ia kiba hok bad kiba khuid un buh ha kata ka Jerusalem ba thymmai lem bad u (JPW 21:9-27). Bad ïa ki bym hok bad kiba tngit un buh ha kata ka pung ka ding bad u kyndok lem bad u soitan lem bad ki angel bymman jong u (Isaiah 66:24; Mathaios 25:41;JPW 20:10; 21:8).