Press "Enter" to skip to content

Kumno ban kyntiew ia ka kor jong ki khynnah skul

Kam long kaba phylla ban ioh sngew ia ka jingud jong ki kmie ki kpa ha kine ki sngi ba ki khun jong ki ki saitlah palat khamtam naduh kiba la shong Klas 6 shaneng. Kane ka jinglong jong ki khun ka la pynktha khlieh shisha ia ki kmie ki kpa. Kawei na ka dawbah jong ka jingkylla ka rukom long ki khynnah kane ka juk mynta ka dei ka jingroi stet jong ka jingstad khamtam jong ka jingmih pyrthei jong ka juk Mobile bad Internet.
Ka jingban khia eh jong ka jingpule ha kine ki sngi ka pynlong ia ki khynnah ba kin ym ioh shuh ia ka por kaba kin pynpyngngad ialade ha ki kam ialehkai bad kilan met hynrei wat ha i por ba tang khyndiat eh ba ki lait ki la shu kynrup noh sha ki mobile bad ruh ki computer nalor jong ka TV kaba la long lypa kawei na ki daw bah kaba pynjaituh ia ki khynnah ha kiba bun ki liang naduh ki kam iing haduh ki kam shimet bad jingpule jong ki.
Ka jingmih jong ki computer bad ki mobile ka la long shisha ka jingpynbyrngia kaba ym don pud na ka bynta ki khynnah khamtam kito kiba dang khie samla kiba la kyrni bha ha kine ki jingialehkai. Hooid wat ki rangbah ruh ki ngop bha ha kine ki atiar ha kine ki sngi bad ka long ka jingeh kaba khraw ha kaba bun kim duh noh ia ki kam ki dup ba ki dei ban trei bad ka la long ka jingtuh noh ia ka por. Hynrei kaba kham khia hi ka long ia ki khynnah skul bad ki samla pule kiba dang don sha ka thong ban leh sha ka lawei jong ki.
Katto katne ki skul ha ka nongbah Shillong ki la pynpaw ia ka jingiakynduh jingeh ha kaba iadei bad ka rukom long jong ki khynnah skul, na ka daw jong katei ka jingioh lad jong ki ban pyndonkam ia ki mobile khamtam lei ki don ruh kiba ioh ban rah ia ki mobile sha ki skul bad buh rieh ban ym iohi ki nonghikai. Tharai kiba bun kim pat klet halor ka jingjia jong ka jingdkat noh jong kawei ka khynnah samla ia ka ka jong ka jingim tang na ka daw ba ki nonghikai kila lap ia ka mobile ba ka pyndonkam.
Ka jingiohlad ban pyndonkam ia ki mobile phone ka ailad ia ki khynnah ban don ka jingiadei kaba jan eh bad ki paralok jong ki wat ha ki kynta kiba ym dei shuh ka por ruh. Ki don ruh ki khynnah kiba pyndonkam ban ia phah dur bad message wat haduh shiteng synsiar bad janshai ruh. Ki nonghikai ki la ioh ban bat ia katto katne ki khynnah kiba pyndonkam mobile kumne bad la iathuh ba kaei kaba ki sakhi lyngba jong ki mobile phone ka long kaba i shyrkhei na ki message bad ki ktien ba ki khynnah ki pyndonkam.
Ka long shisha ka jingeh kaba khraw ia ki kmie ki kpa ban teh lakam ia la ki khun ki ktin ha kine ki sngi, kumba la ong haneng nalor ba ki la bunkam lupa. Ha kine ki sngi ki kmie ki kpa kim da ioh shuh ia ka por kaba biang ban sneng ban kraw ia ki khun ki kti khamtam kito kiba la khie samla ne ki teeage. Ka long kaba eh ban ioh ia ka por ba 15 minit bad ki khun ban kren sha ki, kumjuh ruh wat sha iing mane ruh ki khun kin ioh ban leit tang shi sien shi taiew bad ym thikna ba kin ioh ban shahshkor pura ia ki jinghikai babha.
Hynrei dei tang ia ka skul ba ki khynnah ki dang sheptieng bad ki dang kohnguh sneng. Ym don shuh da kawei pa ka jaka kaba kham bha ba yn lah ban khmih lynti ban ban hikai ia ki khynnah samla kane ka juk mynta. Dei tang ha skul ba ki khynnah ki dang ioh ban shah shkor haduh kumba 40 minit ia iwei i nonghikai baroh shi taiew lynter.