Press "Enter" to skip to content

Pynhap pyrda ka ophis u DSO ïa ka District Level Subroto Cup FT ha madan Umsaitsning

Yn leit mihkhmat ki 3 tylli ki skul sha ka State Level

Nongpoh, Jymmang 18: Ka lympung ïalehkai phutbol ki khynnah skul ba la tip kum ka District Level Subroto Cup Football Tournament 2019 ba la pynlong da ka ophis u District Sports Officer ha Ri-Bhoi District, kaba la sdang naduh ka 7 tarik Jymmang, katei ka lympung kala poi noh sha kaba kut ba la pynhap pyrda noh ha kane ka sngi Thohdieng ha madan ïalehkai ha Umsaitsning.
Ïa katei ka lympung la pynhap pyrda da u Bah Arki Nongrum CEO ka Meghalaya Football Association kum u kongsan bad u Bah Dipshon Ryntathiang Secretary ka RBDSA kum u symbud kongsan ha ka jingdon lang u Bah PM Marbaniang DSO ka Ri-Bhoi District, Bah R Kharkrang Chairman ka Umsaitsning Town Durbar, Bah E Makdoh Chairman ka Umsning Town Dorbar, Bah Min Makri, Bah RB Shadap bad kiwei kiwei ki riew rangbah ka dong Ri-Bhoi.
Haba phai sha ka jingïakhun phainal kaba la long ha madan ïalehkai ha Umsaitsning ha ka kyrdan U-14 ki shynrang ka jingïaleh kala long hapdeng ka Khlieh Umstem Presbyterian Secondary School pyrshah ïa ka Evershine English Secondary School bad ha katei ka jingïakhun ban ïaknieh ïa ka nam lahduh ka Khlieh Umstem Presbyterian Secondary School kala lah ban pynliem noh ïa ka Evershine English Secondary School haduh 4-0 kol.
Haba phai sha ka jingïakhun ha ka kyrdan U-17 ki kynthei ka jingïakhun kala long hapdeng ka Sati Raja Memorial Secondary School pyrshah ïa ka St. Michael’s Higher Secondary School bad ha katei ka jingïakhun ka Sati Raja Memorial Secondary School kala pynliem noh ïa ka St. Michael’s Higher Secondary School da 5-0 kol.
Hynrei ka jingïakhun kaba shongshit bad itynnad ha katei ka sngi ka dei jong ki kyrdan U-17 ki shynrang hadpeng ka Pratlynti Secondary School pyrshah ïa ka Mynken Higher Secondary School ha kaba naduh basdang ka kylla step haduh ba kut ka kylla miet ki rang ïalehkai kila sei bad pyni ïala ki sap ki phong jong ki ha kaba wat la bun ki jingpyrshang na baroh ar kynhun ban ioh thep kol, hynrei ym don ba ioh thep satia, wat hadien ba ka Extra Time ba la rai da ki bor pynïaid.
Hadien ba ym don ba ioh thep kol wat hadien ba la ai ïa ka Extra time na ka liang ki bor pynïaid kila rai ban pynshut noh da ka Tie-Breaker bad dei ha katei ka jingïashut kol kynthei ba la rai ïa ka nam rem nam jop ha kaba da ka jingtbit ki rang shut bol, ka Prat Lynti Secondary School kala lah ban pynliem noh ïa ka Mynken Higher Secondary School da 5-3 kol ban rah syndn kum ka lahduh.
Haba kren ha katei ka jingïalang pynhap pyrda ha katei ka sngi na ka liang u Bah Arki Nongrum kum u kongsan u la pynpaw ka jingsngewkmen ban don ryngkat lang ha katei ka sngi ban sakhi ïa ka jingïakhun phainal ha kaba u la ai ka jingïaroh ïa ka sap kaba ki khynnah ïalehkai ki don.
U la ai ruh ka jingkyntu ïa ki khynnah ïalehkai ha katei ka sngi halor ar tylli ki mat, ba kin trei shitom halor ka sap kaba ki don khnang ba kin poi sha ka thong katkum ka sap kaba kidon, hynrei kum ki khynnah skul kim dei pat ban klet ïa ka jingpule namar ka dei ka atiar ba kongsan ha ka jingim bad ba kin ïaid ryngkat ryngkat bad ka jing pule nalor ka sap kaba ki don.
U la ai ruh ka jingïaroh ïa ki rang bad thei ïalehkai ha katei ka sngi halor ka jingtbit bad ka sap kaba ki don bad khmih lynti ruh ba kitei ki kynhun kin dang kiew shaphrang ha ka kam ïalehkai wat ban mih khmat ïa ka jylla ha ka National Level.
Na ka liang ka ophis u DSO kala sam ruh ïa ki khusnam ha katei ka sngi sha ka kynhun lahduh bad kumjuh ruh kiba rem da ki Trophy, Medal
La sam ruh ïa ki khusnam shimet ba kynthup ïa ka nam Best Goal Keeper ha ka kyrdan U-14 ki shynrang la rah da u Lamphrang Lyngdoh na ka Christian Hr. Secondary School, ha ka kyrdan U-17 ki shynrang la rah da u Ribankyrshan Rympei na ka Mynken Hr. Secondary School, bad ha ka kyrdan U-17 ki kynthei la rah da ka Banrinylla Nongdhar na ka St. Michaels Hr. Secondary School.
Ïa ka nam Best Player ha ka kyrdan U-14 ki shynrang la rah da u Basngewrit Shlem na ka Khlieh Umstem Presbyterian Secondary School, ha ka kyrdan U-17 ki shynrang la rah da Iaryngkat Kharkrang na ka skul Pratlynti SS bad ha ka kyrdan U-17 ki kynthei la rah da ka Ibahunshisha Malieh na ka Satiraja Memorial Secondary School.
Kitei ki kynhun kiba jop ha katei ka lympung kin leit ruh ban mihkhmat ïa ka District sha ka State Level ka ban sa long ha nongbah Shillong.