Press "Enter" to skip to content

Haduh katno la pyndep hok shisha ka ECI ïa la ka kamram

Hato ka jingsynshar ha ka ri kan don mo ka jingkylla hadien ka jingdep ban ñiew ïa ki vote, ha ka 23 tarik mynta u Jymmang, ne katta ka jingkam ki stad nongpeit pyrman bha ïa ka elekshon MP kaba dang shu dep baroh ki hynñiew kylla ka jingthep vote ha ka ri, kaba neh shi bnai tam, kan urlong shisha, kumba ki la pynpaw ha ka sngi ba khatduh jong ka jingthep ïa ki vote. Kane ka dei katta ka khyllipmat kaba u paidbah nong shnong jong ka ri mynta u phai la ki khmat bad ap hi kliaw ïa ka khubor ba mano sha ban synshar ïa ka ri ha kine ki san snem kiban wan.
Lada ïa khmih bniah biang ïa ki hynñiew kylla jong ka jingïathep vote, haba shim kyllum ia ka jingmih u paidbah ban leit ban thep ïa ka vote ka jong u, lah ban ong ba kam da dei than kaba la khmih lynti ïa ka ba kan poi, ne ba kam da dei ruh kaba sniew lada ïa nujor ha ki san snem kiba la leit noh, namar u paidbah ha kane ka ri, don ruh u ba shongshit bha ïa kane ka elekshon hynrei don ruh kiba ngiah bad bym kwah satia ban thep ïa ka vote, namar u la sngew ngiah lypa ïa ki kyntien ïaid ïalap ïa ka elekshon, kaba ha kiba bun ki jingïalang paidbah kiba heh ba la long ha ka ri, ka jingïaid ïalap elekshon ka long pynban tang ha kaban ïa beiñ ïa khohneban ïa sin ïa rngob, hynrei kaba kham bun na ki jingïalang ba u paidbah un lah ban iohsngew ïa ka jingpynbna ïa ki mat treikam ba la thmu ban leh naka bynta ki san snem kiban wan.
Ym lah ban len ba ka elekshon kan nym long kaba shongshit lymda ia kynthah sbur de tiak tiak, hynrei u da don shisha pat u pud wat lada donkam ban kren, hynrei ka jingïaid ïalap ïa ka eleshon kaba mynta ka kynti, ka jingïa sher ktien kaba jur bha ka long hapdeng ka Seng Congress bad ka BJP, kaba mano ba sdang nyngkong hangne ngin nym lah satia ban ïa batai, tangba u pud jong ka jingsher ktien teng khat u la lam shisha shabar u pud ne ka jylli jong ka jingïaid ban ïalap ïa ka elekshon, ha kaba ka ktien kiba laiphew jait, ki la wan ba kinmih paw tad haduh ban da ïa kynnoh ne ïa kdew kti wat ia la ki longïing ki longsem ruh kam don shuh ba ïatyngkai, pynban la phalub naphang lin khlem don shuh ka jingsngew briew.
Ha ki riew khraw pyrkhat bad ki riew ngam jylliew, lehse ki niew ne ki shim ba ka lynti ïaid ïalap ïa ka elekshon MP kaba mynta ka dei shisha kaba ka Election Commission of India kam lah ba kan pyntrei kam hok shisha ïa ka aiñ kat kumba la pynkup bor ha ka, hynrei hangne sngew pat ban kynnoh ba kane ka ophis treikam ba laitluid ha ka ri naka bynta ban pynïaid ïa ki kam ba ïadei bad ki elekshon, ka la shah tehlakam pynban da kaba kam nud ba kan wan shakhmat ban ieng skhem halor ka nongrim ba ym don seng saiñ pyrthei kampher lada dei ba don ha ka liang synshar ne sha ka liang pyrshah, ban pyndonkam pathar ïa ki kyntien, kiba u paidbah ba bun balang um lah ban pdiang ïa ki.
Dei halor kine ki jingpyndon kam ïa ki kyntien kiba lam pynjah burom wat ïa ki nongïalam kiba la khlad noh, ba u paidbah ka ri, uba la kham shemphang u da ngiah hi shoiñ mynta ka kynti, hynrei kaba pyndon ne pynbitar eh ïa u ka long ba ka ophis jong ka Election Commission of India, mynta hi ka kynti kam shym la treikam pura kumba ka dei ba kan leh, hangne ka buh bha ïa ka jingkylli hato lada kane ka ophis ka la trei hok ïa ka kam kan wanrah ïa katta ka elekshon ba khuid kaba suba shisha ha kane ka ri.
Ka jingbym nud shisha jong ka Election Commission of India mynta ka kynti ba kan trekam kumba ka dei ba kan long, ka buh shisha ïa u paidbah nong shnong ha ka ri, ba pleng, man la ki ophis trei kam ba laitluid ba don ha ka ri, lah ban shu pynkam jubor ïa ki ba la aiti laitluid ïa ki ban trei ïa ka kam, hynrei na sha lyndet, ki ïai bteng ban long tang kum ki tyngshop ba la shah khyrwait shabi da ka sorkar.
Lada ïa nujor pat ha ki por kiba kham mynshwa, ki riew paw khmat ka Election Commission of India kum ki jong u TN Seshan, bah JM Lyngdoh ne kum ki jong u MS Gill, lehse ki long da shisha ki heh ophisar jong ka ri, kiba ha ka por ba ki don ha ka shuki ba ha khlieh duh jong kane ka ophis, ki da pynopaw shisha ïa ka main jinglong ba rangbah bha ka jong ki, namar ki trei hok shisha ïa ka kam khlem da tieng ne riej ïano ïano ruh, hynrei ha kane ka kynti kaba mynta jong ka elekshon MP kaba la dep, ka ophis jong ka Election Commission of India, imat ka la pynpaw ba kam don shisha ha ka ïa katta ka maiñ treikam kum kitei ki ophisar ba la kdew haneng, hynrei bunsien ki shu long la kum ki lar en bym don jingsuhthied.
Kaei kaban mih paw hadien ka 23 tarik ka long ba kane ka ophis khlem pep shi rynjaiñ ki har rukom ki jingshah kynnoh ne shah ujor kin ïai mih paw nakiba bun ki seng sain hima sima, kiba hadien lei lei ka jingdep ban iohi ia ki dak jingbatai na ki riew shemphang ban pynpaw ba ka sorkar NDA sa shisien kan khreh ban wan ban synshar biang ïa ka ri, ka ophis jong ka Election Commission of India kan ngat bha ha kiba bun ki liang ban shah kynthih khamtam lei lei na ki seng saiñ pyrthei ba don ha ka liang pyrshah, kaba ïa mynta wat ïa ka resol khlem pat sdang ban ñiew, hynriew kiba bun na ki seng saiñ pyrthei ba don ha ka ri, ki la sdang ban phai beit ïa la ki jong ki khmat sha kane ka ophis da kaba ki dap shisha da ka mynsiem bym hun mynta ka kynti ïa ka rukom ban pynïaid ïa kane ka elekshon.