Press "Enter" to skip to content

Saw kol pynliem ka SLFC ïa ka Delhi Dynamos ha ka Junior League

Shillong, Jymmang 21: Ka Shillong Lajong FC ka la lah ba kan pynliem noh ïa ka Delhi  Dynamos  da 4-0, ha ka lym-pung ïalehkai ka wat ba khatduh ka Junior League ba la long ha Kalyani Stadium, West Bengal hynne ka sngi.

U namtam naka bynta ka SLFC ha kane ka jingïakhun dei u Glennys Godfrey Lynrah uba la lah ban lam khmat ïa ka kynhun ban thep ar kol ba la wan ha ka minit ba 30 bad kaba 43.

Katba ïa ki artylli ki kol kiba sah la thep ïa ki da u Wadajied Kynsai Ryngkhlem ha ka minit kaba 61 bad u Batskhemlang Jyrwa  u la thep ïa ka kol kaba saw bad ba khatduh ha ka minit ba 81.

“Ka long ka jingïalehkai kaba eh bad ba wat ha ïa ka kynhun ka jong ngi, hynrei ka jinglah pat ki khynnah ba  pynurlong ïa kabu ksiar sha ki kol, ka la plie lad bad ai mynsiem ïa ki khynnah ba kin jop ïa kane ka jing-ïalehkai kaba mynta ka sngi” la pynpaw u bah Bobby L. Nongbet haba ïakren bad u Mawphor.

Nalor katta u Bobby u kam ruh ba ka bok ka nusip ka la don lang bad ka kynhun ka jong u hynne ka sngi, hadien ba u rang ap kol ka SLFC u la lah ban kyrda ïa kawei na ki penalty ba ka Delhi Dynamos ka la ioh ba kan shut ha kane ka jing-ïalehkai kaba mynne.

Da kane ka jingjop, ka SLFC kan phai pat la ki khmat sha ka jingïalehkai kaba ar ba la buh ban long pat lashai ka sngi ka 23 tarik pyrshah ïa ka ATK ban long ha ka por 4 baje nohphai sngi ha Kalyani Stadium, West Bengal.

Kane ka dei ka jing-ïakhun jong ka Gr-C bad ka SLFC ka la ioh ba kan ïakhun ha kane ka kyrdan ïalehkai kane ka lympung hadien ba ka la lah ba kan bat ïa ka kyrdan ba nyngkong ha ka por ba ka la ïakhun ïa ka Shillong-Guwahati (zonal Round) hadien ba ka la ioh ba kan khur pura 14 poiñ.

Ki kynhun ban ïaknieh ïa ka nam lahduh jong kane ka lympung ki don baroh 16 tylli ba la phiah ïa ki sha ki saw tylli ki group bad ki klob ba bat ïa ka kyrdan ba nyng-kong na kine ki saw tylli ki group kin buh jaka pat ïalade sha ka semifinal.