Press "Enter" to skip to content

Bun ki kam pyllait im bad sei metïap la leh da ka SRT jong ka F&ES ha jylla

Shillong, Jymmang 22: Watla ha kiba bun ki khep ki pulit jong ka tnad Fire and Emergency Service (F&ES) lyngba ka kynhun ba kyrpang jong ka Search and Rescue Team (SRT) ka dei kaba ju sei beit ïa ki met iap ne kaba ju pyllait im ïa kiba ngam jyllop ne kiba don hapdeng ka jingpluh ding ne ha kino kino ki jingjia ne jingshah lyngshop ha ki bor mariang hynrei kane ka kynhun kam ju ïoh nam namar kiba paw ha ki khubor ki dei beit kita ki SRDF bad NRDF.
Ha ka jingshisha kum ka jingjia ha Diengïong, Mawdiangdiang ha ka 9 tarik mynta u bnai ha kaba lai ngut ki briew ki la ïap hapoh ka pukri katba ki dang ïatrei ha katei ka jaka ruh la ïoh ban sei ïa ki metiap da ka kynhun SRT ym dei satia ki NRDF ne SRDF kumba la paw khubor. Ki lai ngut ki metïap kiba la sei na katei ka pukri ki dei kiba la tip kyrteng kum u Bah Banplie Syiem 28 snem ka rta, Bah Lamphrang Lyngdoh 29 snem ka rta bad u Bah Warles Kharsyntie, 31 snem ka rta. Kine baroh lai ngut ki dei na ka shnong Lumkseh Lama, Umroi, Ri Bhoi District.
Kumjuh ruh wat ïa u samla ba ïap jyllop ha ka kshaid Syndang, Jalaphet, East Jaiïtia Hills uba kyrteng u Mihsalan Chyrmang ruh la sei da ka kynhun SRT hi. Lah ban pynkynmaw ba une u samla uba dang ap ïa ka result SSLC u la ïap jyllop ha katei ka kshaid namar u la kynthih nalor ka kshaid da ka jingthmu ban jngi. Kane ka la jia ha ka 20 tarik mynta u bnai bad dei tad ha ka sngi ba bud la lah ban sei ïa ka met jongu da ka kynhun SRT.
Ym shym ban kynthoh ba ka SDRF bad NDRF kim ïadon bynta, hooid ki ïadon lang tangba kim pat don ki tiar kiba biang katba ki briew jong ka SRT pat ki dei kiba la dep shah pyntbit bha bad ki la biang ruh ki tiar ki tar ban ai jingiarap ha kano kano ka por ba donkam ka jingiarap ba kyrkieh.
Kane ka kynhun ka don 9 ngut ki dkhot hapoh ka jingïalam jong u Sub Inspector Ganesh Muktan, Sub Inspector Satya Pd Dutta,LFM Deepak Kharshiing, FM Kharborlang Kharmawphlang,FM Keshap Thapa, FM Bidhan Ch Hajong, FM Balario Rynshon, FM Tinku Bhayun bad DFM Tangdronath Kharbani.
Haba ïakren bad ka Superintendent of Police (SP) ka tnad Fire and Emergency Service kong Jubi G Momin i la ïathuh “Ia kane ka kynhun ba kyrpang jong ka tnad la pyntbit bha nadong shadong ryngkat ki tiar ba donkam bad ha kiba bun ki khep ha ka jylla haba don kino kino ki jingjia ba sngewsih kum ki jingpluh ïing, ki jingngam jyllop, ki jingshah lyngshop ha ki bor mariang , ki jingjia ïa tyngkhuh ne kylla kali kane ka kynhun ka la hap beit ban leit ai ki jingïarap ban sei ïa kiba ïap ne ïa kiba mynsaw ruh.
Kumta ka jingbuh jong ka tnad ïa kane ka kynhun ka la ïarap shi katdei eh bad ka jingthmu jong ka tnad F&ES ka long ban nang pynkhaiñ bad pynbun briew shuh shuh ha kane ka kynhun.