Press "Enter" to skip to content

Bun ki Mission Sorkar, tangba hap treilang ki Department ban myntoi ka Jylla: Ma Lahkmen Rymbui

Khuslai u Myntri ba nang ringsdot ka mei-ramew

Shillong, Jymmang 22 : U Myntri ka tnad Forest & Environment, Bah Lahkmen Rymbui ha ka sngi Balang, u la kyntu jur ïa ki tnad sorkar ba kin don ka jingïatrei lang kaba ryngkat ryngkat khnang ba ka jingmyntoi kan dei ïa ki paidbah nongshong shnong bad ïa ka Jylla hi baroh kawei.
Haba kren kum u Kongsan ha ka jingrakhe ïa ka International Day of Biological Diversity kaba long ha Soso Tham Auditorium, u Bah Lahkmen u la ong ba na ka por sha ka por la ju ïohi ba ka sorkar ka thaw bad pynbna ïa ki Mission bapher bapher kynthup naduh ka Aquaculture Mission kaba dei kyrpang na ka bynta ki nongri dohkha, kumjuh ka Milk Mission, Jackfruit Mission nalor bun kiwei kiwei ki Mission.
“Hynrei kaba donkam ka long ba donkam ban ïasam ïa ki jingtip bad khamtam eh ka jingïatreilang hapdeng ki tnad sorkar khnang ba ka kam kan ym kut tang ha kato ka tnad,” u la ong
da kaba kyntu ruh ba kiei ki jingtip kiba ka Meghalaya Biodiversity Board ka ïoh kadei ba ïa sam ne pyntip lang bad kiwei pat ki tnad sorkar khnang ba ka jingmyntoi kan dei hi ïa u paidbah bad ïa ka jylla hi baroh kawei.
U Myntri u la ong ruh ba na kaei kaba u ïohi ha katei ka sngi, ka Board ka la ïohlum thup shibun ki jingtip kumno ba pynneh pynsah ïa ka mei-ramew bad ki jingim kiba don ha ka. Kumta, u la kyntu ïa ka ruh ba kadei ban trei ryngkat ryngkat bad ki paidbah khnang ba kito ki jaka kin ïoh ïa ka jingmyntoi.
“Donkam ruh ka museum ba pyni ïa kine ki jinglum thup baroh ban pyni ïa ka jingriewspah ka jylla. Ym dei ban pyrkhat tang kum ka Board ha ka jingtreikam hynrei ban trei kum ka sorkar na ka bynta ka jingmyntoi ki paidbah,” u la ong da kaba kyntu biang ïa ka Board ba kadei ban treilang bad kiwei ki tnad sorkar khnang ba ka thong treikam jong ka, kan long kaba jop.
Katei ka jingkren jong u Myntri, kadei hadien ba ka Board, ka la pyni ïa ki phlim lyngkot halor ki jingdon jingem kiba ka jylla ka don (khamtam ha Mawlyngbna) la ka long ha ki syntiew ki skud, ki sim ki doh, ki dawai kynbat, ki jait khñiang ba harukom, ki syntiew-dieng bad kiwei kiwei ki jingthaw ba-im kiba kham ñiar ban shem ha kine ki por mynta.
U la ong ruh ba da la ki khmat u sakhi ba ka mei-ramew mynta ka la nang ringsdot naba wat ki diengsoh ñiamtra kiba ju pynmih soh ha ki khyndiat snem hynrei mynta pat ki la jah lut. Ym tang katta, u ong ruh ba ka jingbym don shuh ki sim ki doh ha ka mariang ka la pynlong ïa ki khñiang ban bam lut ïa ki jhur ki jhep ba ki paidbah ki thung. “Kumta donkam ban tip ba ha ka bor mariang ngi donkam lang hapdeng ki jingthaw ba-im, naduh i jingthaw iba rit eh,” u la ong.
Kumta, u la kyntu ba watla ha kane ka juk bun ki beh ïa ka kamai, hynrei kum ki nongshong shnong kidei ban don ruh ka jingkitkhlieh ym ban shu khwan spah da kaba pynjot pat ïa ka mei mariang.
Ha kane ka sngi, u Kongsan u la pyllait paidbah ruh ïa ka kaiphod kut snem jong u snem 2015-18, nangta ki kot lyngkdop bad sam ruh ïa ki khusnam sha ki nongjop ha ka jingïakob dro dur, shondur bad thoh esse.
Nalor kine, la pyni ruh ïa ka phlim ba lyngkot ba ai kyrteng, “Giant Steps to Conservation by a Small Village, Mawlyngbna”.
Ha kane ka sngi la ïoh ruh ïa ka jingkren na u Secretary, Meghalaya Biodiversity Board, u MBK Reddy, nangta na u PCCF & HoFF, Meghalaya, u CP Marak ryngkat ka jingdonlang ki ophisar katei ka tnad, ki nonghikai bad kumjuh ki khynnah skul.