Press "Enter" to skip to content

Kyndang ka HYC ïa ki nongbylla bar jylla ha Industrial Estate Umïam

Nongpoh, Jymmang, 22: Da ki spah ngut ki nongbylla bar jylla kiba ju trei bylla ha ki Karkhana kiba don ha Industrial Estate ha Umïam, mynta ka sngi balang ki la shah kyndang ha ki dkhot ka Hynñiewtrep Youth Council (HYC) kaba la pyntreikam ïa ka ‘Sierlapang Operation’ ryngkat ka jingïatreilang ka HYC, Ri Bhoi District.
Ka jingshah kyndang kine ki bar jylla ka dei halor ka nongrim ba kim don ïa ki kot ki sla kiba biang.
Ha kane ka jingkhynra, la lap da ki spah ngut ki bar jylla kiba la trei bylla khlem ki kot ki sla ha ki Karkhana otdieng ba don ha Industrial Estate ha Umïam.
Ha kane ka jingkhynra la ïalam da u Vice President, u Samla Rhembor G. Saibon, u Samla Gee Mawlong, Organising Secretary ryngkat kiwei kiwei ki nongïalam na ka District bad ruh na ki Circle bad ki Unit bapher bapher kiba don ha Ri Bhoi District.
Ki dkhot ka seng kiba la hiar jurip ïa ki karkhana ha Umïam, ki la lap da ki spah ngut ki bar jylla ki la wan trei beaiñ khlem da ïoh jingbit na ki bor ba dei peit bad khamtam khlem ki kot ki sla kaba long ka jingwantrei be-aiñ.
Kumba la lap da ka seng ha kane ka jingjurip kaba kham sngewphylla ba bun na ki Karkhana ki la khang khyrdep tang hadien ba la ïoh jingtip ba ka HYC ka la khynra nongbylla bar jylla. Kane ka pynpaw ba don eiei shalyndet.
Haba ïa kren bad ki Nongthoh khubor, u Organizing Secretary ka HYC, Central Body, u Samla Gee Mawlong u la ong, “ha kane ka jingkhynra ngi lap da ki spah ngut ki bar jylla kiba wan bylla kim don wat ka Labour License na ka KHADC bad ki don ki Karkhana ki bym don wat ka Trading Licesne kaba long ka jingpynkheiñ aiñ.”
“Namarba kine ki bar jylla kim don kot don sla ka seng ka la shim da ka rai ban beh noh bad khlem ailad shuh ban dang trei ha kane ka jaka kum shi bynta ban pyrkhing ïa ka jingwan rung be-aiñ ki bar jylla kiba khlem da don ki kot ki sla” u la ong bad bynrap, “ïa kito kiba don ki Labour License la ailad ba kin dang trei bad kito kiba ym don pat ki Labor License ne ki kot ki sla la beh bad phah ban leit phai noh sha ki Shnong ba ki wan na ki jylla bapher bapher.”
U Vice President, u Samla Rhembor G. Saibon haba bynrap halor kane u la ong ba ka seng ka dap da ka jingsngewkhia halor ka jingkheiñ sting ka District Council ban tehlakam ïa ka jingwan rung tuh ki bar jylla khlem ki kot ki sla kiba biang bad kane ka paw pyrthei ba ka dei hi ka jingtlot bor ka District Council ha kaba ki bar jylla khlem da don ki Trading License bad ki Labour License ki ïoh thik thik ban treikam bad ban kamai kajih ban kjit ïa ka spah na ka jylla.
Shuh shuh, u la ong ruh ba ka seng kan sa leit ruh ban kynduh ïa ki bor ka KHADC ban ïakren halor ki jingduna bad khamtam ban tehlakam kum ha kaba tehlakam ban ai trading bad Labour License klumar sha ki bar jylla kaba buh jingma ïa ka jaid bynriew bad ruh na ka liang ka seng kan dang trei borbah ban pynjur ïa ka Sierlapang Operation ha baroh ki bynta jong ka jylla bad lada ka dang lap ba ki bar jylla ki wan leh mon ha ka kamai kajih tang ban kjit ïa ka spah na ka jylla ka seng ruh kan shim da ki lad kiba tyngeh khlem jingmap la ka dei ban ïaid katkum ki lynti jong ka aiñ.