Press "Enter" to skip to content

Lap ka KSU ba treikam ki bar jylla da ki laisen KHADC ha Jaiñtia

Shillong, Jymmang 22: Ka Khasi Student’s Union War Jaiñtia Circle ha ka sngi Saitjaiñ ba la dep ka la lap ba bun ki nongbylla bar jylla kiba trei ha kylleng ka thaiñ Amlarem, West Jaiñtia Hills ki pyndonkam da ka Labour License jong ka Khasi Hills Autonomous District Council.
Ha katei ka jingkhynra ba ïalam da u Bah Laitphar Syngkrem, President ka Circle, ka seng ryngkat u Raymond Kharjana, Environmental Secretary ka KSU Seng Kmie, ki la lap ruh ba bun kitei ki nongbylla bar jylla kim don satia ïa ki labour license.
Haba kren bad ki lad pathai khubor,u president ka KSU, u Bah Laitphar, u la maham ïa ki kontraktor ba kim dei satia ban warah nongbylla da ki briew kiba nabar khamtam ki bym don ki kot ki sla kiba biang. U ong ruh ba ka jingkhynra kadei namar ki ïohi ïa ka jingjyllei ki briew kiba nabar jylla kiba wan ban knieh ïa ka pliang ja jong ki trai shnong. U ong ba ha katei ka jingkhynra, ki ïohi ruh ïa ka jingduna treikam jong ka Jaiñtia Hills Autonomous District Council. Ym tang katta, u ong ruh ba markhmat ki lap ba ki labour license ba ai da ka KHADC, kitei ki nongbylla ki pyndonkam ban wan bylla ha u pud u sam jong ka Jaiñtia Hills,
Ha kajuh ka por, la kyntu ruh ïa ki nongïalam shnong ba ki dei ban shim lang ïa ka jingkitkhlieh bad peitngor khnang ba ki briew kiba nabar kin ym ïoh satia ban rung bad mih katba mon ha u pud u sam jong ka shnong.
Shwa kane, ki nongïalam ka KSU ki la beh lut ïa baroh ki nongbylla bym biang kot biang sla nalor ba ka khang tala syndon wat ïa kitei ki jaka treikam kiba pyndonkam da kitei ki briew.