Press "Enter" to skip to content

Ngi ohdor T.30 ban khanglad ïa kiba wan leh khlemakor ha paiñkhana: Bah Mayven

Khot hajir ki Pulit ïa ki nongïalam ka HANM

Shillong, Jymmang 22: Ka Marbaniang Project Private Limited kaba pynïaid ïa ka Marba Hub kaba don ha Khyndai Lad Shillong ka la pynshai paidbah ba ka jingoh dor T.30 ïa ka bai leit pynjhieh bad leit paiñkhana kaba don na Shopping Mall jong ka Marba Hub, ka long shi kum shi bynta ban khanglad ïa ki briew kiba ju wan dih kyiad bad leh khlemakor hapoh ka paiñkhana jong ki kynthei bad ki shynrang kiba ladep jia ha ki snem ba ladep.
U Chairman-cum-Managing Director (CMD) ka Marbaniang Project Private Limited u Bah Mayven T. Marbaniang u la ong, “ka jingbuh dor T.30 na ka bynta ban siew ïa ka bai leit pynjhieh bad leit paiñkhana ka dei hadien ba ngi lap ha ki snem ba ladep ki don ki briew kiba ju wan dih kyiad bad leh khlemakor hapoh paiñkhana jong ki Shynrang bad Kynthei. Ym tang kata, hynrei ki pynpait wat ïa ki Commode, ki pynpait ïa ki jingbuh jingsat hapoh ka paiñkhana kat haduh ba ka la wanrah ka jingjulor bad ka jingduhnong ïa ngi ki trai nalor ba ngi khlem shim pisa wat tang shi naïa na ki briew kiba wan thied jingthied bad kiba wan pyndonkam ïa ka paiñkhana.”
Kane ka jingpynshai jong u Bah Mayven ka dei hadien ba ki dkhot ka Hynñiewtrep Achik National Movement (HANM) dang ha ka sngi palei jong ka taiew baladep ki la leit khang khyrdep ïa ka paiñkhana ba don ha Marba Hub hadien ba ki la ïoh ujor na ki paidbah halor katei ka jingohdor T.30.
U Bah Mayven ha u kyrwoh u la ong ba u la kren ruh lyngba ka Mobile Phone ïa uwei na ki nongïalam ka HANM, u John Sangma ban pynshai halor ka jingbuh dor T.30 namarba ha katei ka sngi u don sha Mumbai.
“Ngam poi pyrkhat pat ba kin khang khyrdep pat ïa ka paiñkhana hadien ba nga ladep kren pynshai ïa ki,” ong u Bah Mayven bad bynrap, “ka jingkhang khyrdep ka la ktah ïa ki nongtrei kiba trei ha Marba Hub haduh lai spah tam ngut.”
U pynshai ruh ka jingmudui da ka ejahar pyrshah ïa ka HANM ka dei halor ka jingwan rung jubor hapoh Marba Hub kaba dei ka jaka riewshimet bad khang khyrdep ïa ka paiñkhana. U la ong ba lada kim khang khyrdep ïa ka paiñkhana ka Marbaniang Project Private Limited kan ym jin da la mudui ejahar.
Ha kajuh ka por u la pynpaw ba ka Marbaniang Project Private Limited ka kloi ban ïakren sngewthuh bad ka HANM lada ki wan ban ïakren ha kano kano ka por.
Hynne ka sngi balang, ki Pulit ka Sadar Police Station ki la khot hajir ïa ki nongïalam ka HANM ban tohkit la ki donkti neem ban pynhuri hura, rung jubor bad khang khyrdep ïa ka paiñkhana ha Marba Hub.
U General Secretary ka HANM, u Bah Bobby Basaïawmoit ha ka jingïakren bad ki nongthoh khubor hadien ba la mih na thanat Sadar Police Station u la ong, “ngin sa mudui sha ka District Consumer Disputes Redressal Forum pyrshah ïa ki nongpynïaid ka Marba Hub halor ka jingohdor haduh T.30 tang ban leit pynjhieh.”
U Vice Chairman ka Anti Influx Operation Cell u John Sangma haba bynrap halor kane u la ong, lada ka tnad Pulit bad ka Sorkar kam peit ïa kine ki kam khrong pisa be-aiñ na ka liang ka Seng kam banse ban shim da kane ka lynti kaba tyngeh.