Press "Enter" to skip to content

Jurip u MLA bad ki Ophisar PWD ïa 3 tylli ki project ba sahteng ha Nongpoh

Nongpoh, Jymmang 25: U MLA ka Nongpoh u Bah Mayral Born Syiem ryngkat bad ki engineer ka PWD Building, hynnin ka sngi thohdieng, kila leit ban jurip ïa 3 tylli ki project sorkar ba dang sahteng haduh mynta naka bynta ban pynsted ïa ka kam bad pyndep noh kumba la thmu bad angnud ban pyndep.
Kitei ki 3 tylli ki project ki kynthup ïa ka Polytechnic kaba la tei haka shnong Nongkhrah, ka school building jong ka Nongtluh Higher Secondary School Diwon, bad ka ophis jong u Sub Divisional School Education Officer kaba ym pat lah ban pyndep haduh mynta.
Kum u MLA ka Nongpoh u la shimkhia ruh ban leit jurip hi dalade ban leit peit ïa ka jingïaid beit jong ka kam bad sted sha ka jaka bala tei ïa ka polytechnic kaba don haka shnong Nongkhrah kaba la mang haduh 7 klur tam, ïa kaba la sdang ban tei naduh u bnai Rymphang mynta u snem bad khmih lynti ba ïa katei ka jaka pule (Polytechnic) yn lah ban pyndep noh hapoh 2 snem ha kaba ka jingtrei mynta ïa katei ka jaka pule kala iaid shaid shaid.
Ha katei ka sngi ka jingleit jurip la sakhi ruhd da ka jingdon lang u Bah Ransom Sutnga EE ka PWD Building, Nongpoh Division, Bah G Langstang Asst. Engineer ka PWD Building ryngkat kiwei kiwei ki riew rangbah bad ophisar.
Ha kaba ïa dei bad ka skul Nongtluh Higher Secondary School kaba don haka shnong Diwon, kaba dei ruh ka jingtei ïa ka school building bad ban maramot ïa ka building barim bala mang pisa da ka Asian Development Bank la khmih lynti ruh ba ïa katei ka project yn sa lah ban plie noh mynta u bnai Jylliew ban wan.
Nalor kitei ki project kiba la khmih lynti ban pyndep noh, naka liang u MLA bad ki Engineer ka PWD building kila leit ruh ban jurip ïa building jong ka ophis u Sub Divisional School Education Officer kaba la sdang naduh u snem 2011 hynrei haduh mynta katei ka building ka dang sahkut khlem pat lah ban pyndep ha kaba ïa katei ka building ruh la khmih lynti ban pyndep noh hapoh u bnai Nailar mynta u snem.
Haba kren sha ki nongthoh khubor hadien ka jingjurip u Bah Mayral Born Syiem MLA ka Nongpoh u la pynpaw ka jingsngew kmen kaba khraw ban iohi ba ka kam kala ïaid shaid shaid ban pyndep noh ïa kitei ki project ba dang sahteng kynthup ïa ka Polytechnic, ka school Nongtluh Diwon Higher Sec School bad ka Building jong ka ophis u DSEO ha Nongpoh.
Ka Polytechnic ka dei kawei naki jaka pule bala khmih lynti tam ha Ri-Bhoi naka bynta ka jingmyntoi ki samla ba kim donkam shuh ban leit pynlut bad pule shabar hynrei katei ka jaka pule ki samla kan ai ka jingshakri sha ki khun samla ka dong Ri-Bhoi kiba pule haki lain bapher bapher” la ong u Bah Mayral da kaba bynrap ruh ba ïa katei ka project la khmih lynti ban pyndep hapoh ka por bala buh naka bynta ka phase-I.
Shuh shuh u la ong ruh ba kum u nongmihkhmat u la pynpaw ka jingsngew nguh ïa ka Raid Nongkhrah bad Nonglyngdoh kaba la ai ei ïa ka jaka ban tei ïa katei ka jaka pule, bad iohi jngai naka bynta ka lawei ki khun ki kti bad ka pateng ka ban sa wan halor ka pule ka puthi.
Nalor katei ka Polytechnic la khmih lynti ruh ba shen yn sa lah ban pyndep noh ïa ka skul Nongtluh Higher Secondary School Diwon bad ka ophis u SDSEO, Ri-Bhoi.
Naka liang u Bah Ransom Sutnga, EE ka PWD Building u la kular ruh ba kitei ki project yn sa lah ban pyndep noh shen ha lane shwa ka por bala buh kumba la donkam naka bynta ka jingmyntoi ki samla pule, u la ong.