Press "Enter" to skip to content

KA NONGBAH U DABID

Wanda Kharbani, Lumpyngngad Umyiap

Hadien ka jingkhlad noh jong u syiem Saul ki judah ki la thung syiem ïa u Dabid. Haba u la synshar ïa ki kumba hynñiew snem kiwei pat ki jaid Israel ruh ki la mynjur ban ithuh syiem lang ïa u. Ka thong kaba hakhmat eh jong u kum u syiem ka hima Israel ka long ban ïoh knieh noh ïa ka Jerusalem. U la pynkhlaiñ ïa la ka kynhun shipai. Ha kata ka por ha Jerusalem la shong la sah da ki jebus ki briew ki bym dei ki Israel bad la tip ruh ïa ka kum ka nongbah jong ki Jebus. Ym shym la don hangta wat tang kawei ruh ka jaid Israel. Ka jingkut jingmut ba skhem ka la neh hapoh jong u syiem Dabid ba u dei ban ïoh knieh ïa ka Jerusalem na ki jebus bad un pynlong ïa ka kum ka nongbah jong ka Israel. ïa ka Jerusalem la ker da ki kut bad ki kynroh kiba skhem bha ha baroh ki liang. ki nongshun kim ïohlad ban rung shapoh namar kita ki kynroh bad ki kut ki shakri kum ki nongïada kiba biang tam ïa ka nongbah baroh kawei. Ban rung shapoh jong ka dei tang na ka khyrdop bad shisien ba la khang ïa ka khyrdop ym don shuh da kawei pat ka lynti.
Haba ki Jebus ki la ioh jingtip ïa kata ka jongthmu jong u syiem Dabid ki la ibeiñ bad ipoh jur ïa u. Ban pyni ba ki israel kin ym ïoh da leilei ruh ban knieh ïa ka Jreusalem na ki bad da ka mynsiem ba sngew sarong ki la buh pahara da ki dkoh bad da ki matlah ha baroh sawdong ki kynroh jong ka nongbah. Ki la kren mynthi ruh ïa u Dabid ” Men ym ïoh wan shane lymda men shim noh ïa kiba matlah bad kiba dkoh .”[2 Samuel 5:6]. Ki la khang skhem bha ïa ka khyrdop heh bad kumta kim don shuh ka daw ban sngew sheptieng bad ban khuslai. Ka mynsiem jong ki ka suk jaijai namar ki pyrkhat ban ïoh knieh ïa ka Jerusalem ka dei tang ka jingmutdur bieit u syiem ki Israel. Kumno ki nongshun kin ïoh wan rung shapoh namar ym shym plie ïa ka khyrdop. Ki kyrmen ba ka jingshah knieh noh kan ym jia bad kin ym duh noh ïa ka hok ka jinglongtrai ha Jerusalem. Ka Jerusalem ka dei ka nongbah ka bym ju mad ïa ka jingkyrduh um namar ka don ha ka ïa ka Gihon ka umpohliew ka bym ju thait bad ka bym ju rngad. Wat ki jebus ruh ki sngewthuh ba kata ka jingpahuh um ka khring ïa kiwei pat ban ikwah ïa ka nongbah jong ki.
Kumta ki shna ka kut jingïada ïa ka Gihon baroh sawdong. Ki shna ruh de sa uwei u Tzinor[ u nala um] na ka nongbah uba hiar arsut shapoh haduh ba un da ïakynduh lang bad kata ka kut ha Gihon. U syiem Dabid u dei u nongsaiñ hima uba proh bad u nongïalam uba shembuit. u tip ba dei satang uta u tzinor hi u ban ïarap ïa ki Israel ban ïoh rung shapoh Jerusalem. U kular hakhmat ki shipai jong uba uno uno uba nud ban leit kiew nyngkong eh sha Jerusalem ïa uta yn pynlong u khliehduh jong ka kynhun shipai Israel.U Joab Ben Zeruyah u shipai bashlur bad ba satar u la wan shakhmat ban leh ïa kata ka kam. u Dabid u la bthah ïa u Joab ba un leit sha Gihon bad haneng ka kynroh un lap ïa uwei u tzinor. U dei ban rung ïalade shapoh uta u tzinor bad kiew beit beit shajrong katkum ka jingïalam jong u haduh ban da poi sha kliar. Khlem kano kano ka jingsngewsyier u Joab u la leh thik kumba la bthah ïa u da u syiem, Na uta u tzinor u la kiew beit shajrong bad haba u la poi ha kliar u la ïohi ïa ka nongbah Jerusalem.Ki jebus kim shym la buh jingkhang hangta bad la shu ieh rynghang ïa u . U Joab u la mih noh shabar nangta bad mynta u la ïoh ban ïuhkjat hapoh ka nongbah ki jebus. Ki jebus kim shym ïohi ba u nongshun u la don hapoh bad ka jingma bakhraw ka ap ïa ki. U Joab u la mareh sted sha ka phang ba ka khyrdop heh ka don bad u la plie ïa ka. Ki shipai Israel kiba la pynkhreh bha ïalade ki la ap lypa habar. Tang mar ïa plie ka khyrdop buk ki la rung kynsan shapoh . Ki jebus ha ka jingbym poi pyrkhat bad ka jingbym pynkhreh ki la kulmar jingmut thlim. Ha shuwa ba kin sngewthuh kaei kaba ki dei ban leh ki Israel ki la da ïoh ïa ka jingjop bad ki la kurup noh ïa ka Jerusalem na ki kti jong ki. Kim lah shuh ban leh eiei hynrei tang ban shu pdiang ïa ka namrem .
Ki la duh noh ïa ka jinglongtrai ha Jerusalem bad ki la hap nguh syiem ha u Dabid. Hadien kata ka jingshah kurup noh ïa ka Jerusalem la khot ruh ka Nongbah u Dabid. U Solomon u ong,” Ka jingsarong ka leit ha shuwa ka jingjot bad ka mynsiem ba sngew meng ha shuwa ka jingkyllon.” [proberb 16:18]. Kane ka dkhot ka kren shaphang ki Jebus bad ha kajuh ka por u Solomon u maham ïangi baroh ba ngi dei ban kiar na ka jingsngew meng bad ka jingsarong. U syiem Dabid u jied ïa ka Jerusalem ban pynlong kum ka nongbah jong ka hima Israel namar ka jingdap jingbiang jong ka um . Ka um ka dei ka jingdonkam ba kongsan tam ïa baroh. Ka umpohliew Gihon ka dei ka tynrai jong ka jingpahuh um ka nongbah. Ka Gihon ka ai shibun eh ka um. U syiem Dabid u jied ruh ïa ka Jerusalem namar ka dei ka jaka ba longpdeng bha ïa ka hima baroh kawei. Hashuwa ka jingshah kurup noh dei tang ki Jebus kiba don hangta. Kumta u sngewthuh ba lada hangta un pynlong kum ka nongbah baroh ki khun Israel kin don kajuh ka jingsngew. Ka jingsngew trai bad ka jingsngew nongwei kin ym ïoh suhthied da leilei ruh hapdeng ki briew jong u.La jied ruh ïa ka Jerusalem namar ka lah ban ai ka jingïada bad ka jingshngaiñ na ki nongshun. Kito ki kynroh bad ki kut baskhem ki dei kiba biang tam ban khanglad ïa ki nongshun.U syiem Dabid u jied ruh ïa ka Jerusalem namar dei u Blei uba la jied nyngkong ïa ka, ” Nga la jied ïa ka Jerusalem ba ka kyrteng jong nga kan ïoh long hangta.”[ 2 khronikl 6 :6].
Ha u snem 1867 u sir Charles Warren jong ka Palestine Exploration Fund[PEF] u la sdang ïa ka jingtih bad ka jingwad bniah ha ki bynta jong ka Temple mount . ïa ka jingtrei jong u la pyrshah jur da ka Ottoman Authorities. Namar kata ka jingpyrshah u la kynriah noh sha ka phang shathie jong ka Temple Mount . Ha kata ka jingwad bniah hangta u la lap ïa kawei ka nala ka ba jrong bha. U la buddien bad pule bniah. Na kata ka rukom long jong u , u sir warren u sngewthikna ba katei ka dei ka nala jong u Hesekaiah [ THE HESEKIAH TUNNEL] . Ha ka jingsynshar jong u syiem Hesekaiah u ïohi ïa ka jingsdang wan hiar jong u syiem Sennakarib sha u pud u sam jong ka Israel . U sngewthuh ba ka hima jong u kan sa ïa kynduh jingeh. Kumta ka jingpynkhreh ka long kaba donkam palat. Kawei kaba u tip shai ka long ba lada ka jingshah kerkut ka jia ka jingdonkam kaba khrawtam ïa baroh arliang – ka liang kerkut bad ka liang shah kerkut ka dei beit ka um. U syiem Hsekaiah um shym la kwah ba ki nongshun jong u kin ïoh shibun ka um . Kumta u la bthah ïa ki briew jong u ba kin shna kawei ka nala kaba sdang na Gihon shaduh Siloam ka pung kaba ha Jerusalem.
Ka jingthmu jong kata u nala ka long ban wanrah noh ïa ka um tang hapoh ka nongbah hi, ka um kan ym tuid ne mih shuh shabar ka Jerusalem. Kata ka nala ka jrong kumba sanspah laiphew mitar. Da kaba leh kumta ki Israel kin ïoh shibun ka um hynrei ki Assiria kin ym ïoh eiei. Nalor kata ka nala u Hesekaiah u sir Warren u la lap sa uwei pat ba ka nala ka bym shym la shna ha khyndew hynrei kaba kiew beit beit shalor.Kumta u la kiew shajrong da kaba bud na kata ka nala kaba jrong kumba sanphew phut. Haba u sir Warren u la poi ha kliar u ïohi ba u lah ban mih shabar. U la mih noh shabar na kata ka nala. Haba u ïeng hangta shisyndon u sngewthuh shai ba uta hi u dei u tzinor ba u Joab u la pyndonkam ban kiew sha Jerusalem. Kata ka jaka ba u hangta ba ki kjat jong u ki dang ïeng ka dei ka nongbah u Dabid. Kumba ar hajar snem ïa ka nongbah u Dabid la buhrieh noh. Ym don ba tip ïa ka hangno ka don . Kata ka jinglap jong u sir Charles Warren ka ïathuh ïa ka pyrthei baroh kawei hangno ka bynta ba thikna jong ka nongbah u Dabid. Ka don ha ka phang shathie lam mihngi na ka Temple mount. Hadien jong u sir Charles Warren haduh kine ki sngi bun tylli ki kynhun ki dang ïai pynlong ka jingwad bniah ha kata ka nongbah ba la shem pat. ( Mawphor phai dien)