Press "Enter" to skip to content

Ban die jaka sha ki shipai ka long pyrshah ïa ka riti dustur Khasi: SOMALA

Shillong, Jymmang, 30: Ka Social Organization of Meghalaya against Land Alienation (SOMALA) ka la kynthoh tyngeh ïa ka jingthmu ban die jaka sha ka tnat shipai Border Security Force (BSF) ha ka shnong Lakhra–Beltola bad ong ruh ban die jaka sha ki shipai ka long pyrshah ïa ka riti ka dustur jong u Khasi.
“Ki khubor kiba mih ha ki kotkhubor ba ka Hima Mylliem bad ka Raid Marwet ki thmu ban die jaka sha ka BSF, ka long ka khubor kaba kthang ïa ka jaidbynriew baroh kawei. Lada ki sengbhalang ki dang  ïaleh tyngeh ban khanglad ban die jaka sha ki mynder, ki nongsynshar u Syiem u Kmie ki pyrkhat ban die suk ïa ki jaka puta sha ki shipai ka la pynkyndit ïa ngi kumba iuh tdong bseiñ,” ong u Convenor ka SOMALA, u Bah W. Anthony ha u kyrwoh.
Kum ban shu pynkynmaw, ka KSU lyngba u General Secretary u Samla Donald V Thabah, ka kynnoh ba ka Hima Mylliem ryngkat ka Raid Marwet ki thmu ban die ïa katei ka jaka kaba heh haduh 1000 hectare sha ka tnad shipai BSF.
“Kumta ngi kyrpad ïa ki Khlieh Nongsynshar u Syiem u Kmie ban kynriah noh na katei ka jingthmu ban die jaka sha ki shipai namar ka long pyrshah ïa ka riti ka dustur jong ngi ki Khasi. Ka long pyrshah ruh ïa ka Sixth Schedule ban ai shaawei ïa ki jaka jong ki riewlum,” la ong shuh shuh u Bah Anthony.
“Ngi khmihlynti ïa ki nongsynshar u Syiem u Kmie ban bat skhem ïa ki riti ki dustur namar dei ka riti ka dustur kaba pynong Syiem ïa ki. Khlem ka riti ka dustur ngi la jot la pra,” u la bynrap.
Une u nongïalam ka SOMALA haba kynthoh halor kane, u la ong, “dang shen ngi la thoh shithi sha u Myntri Rangbah ka Jylla ban buh tarik ban ïakren halor ka Meghalaya Land Transfer Regulation Act, 1971 kumno ban pyntreikam kyrkieh bad ban pyntreikam thikna. Pynban mih kine ki jingpyrkhat kiba pyndukha ïa ka mynsiem jong ngi baroh.”
“Horkit hordang ngim dei ban ai jaka sha u shipai namar ha ka ri jong ngi la syrtap lypa da u shipai kaba wanrah ïa ka jingduhnoh suda ka jaidbynriew ha kiba bun rukom,” u la ong.
Ha kaba ïadei bad kane ka jingshah kynnoh, u Syiem ka Hima Mylliem u Pa’iem Ainam Manik Syiem, u la pynshai ba u trai jaka u ladep ïoh ïa ka No Objection Certificate (NoC) na ka shnong bad u la pan jingbit shwa na u Syiem Raid hynrei na ka liang u Syiem Raid u la pan ïa ka jingmynjur na ka Hima Mylliem. Ka ophis u Syiem ka Hima Mylliem kaba la shong da ka Executive Committe ka la pan ïa ka jingmynjur na ka Khasi Hills Autonomous District Council.