Press "Enter" to skip to content

Wan basan ka Meghalaya ha ka jingbun kiba kyrni dih duma

Shillong, Jymmang 30: Ka jingkyrni ïa ka jingbam bad ka jingdih duma ka long ka daw kaba kongsan eh kaba wanrah ka jingïap bad ka long ruh kawei ka jingmlien kaba dkhat kloi ïa ka jingim briew. Manla u snem, hynniew milian ki briew ki ïap na ka daw ba ki bam bad ki dih duma. Ha Ri India, 1.2 milian ki ïap tang na ka jingdih duma. 80% ki briew ki ïoh ïa ka jingpang bampong shyntur na ka jingkyrni dih duma.
Katkum ka kaiphod jong ka GATS 2 (2016 -2017), ka Meghalaya ka wan ha ka kyrdan kaba 5 ha
ka jingdon ki nongdih bad nongbam duma kaba kot 47% bad ka wan baar ha ka jingdon ki nongdih duma ha ka thaiñ Shatei Lam Mihngi kata da 31.6%. Ka Jylla Meghalaya ka dei kaba jur eh ki briew kiba ïohpang bampong ha u tangnguid (esophageal) ha ka ri baroh kawei.
Napdeng ki phra tylli ki jingpang kiba shyrkhei tam kiba dkhat ïa ka jingim briew, ka jingdih/bam duma ka don jingïadei bad hynriew tylli na kitei ki phra tylli ki jingpang. Kita ki long ki jingpang klongsnam, ki jingpang kiba ktah ïa ki thied snam bad jingbymïaid bha ka snam kaba lam sha ka jingduna ka lyer oxygen ha ka jabieng, ki jingpang ba ktah ïa ki tyndong ring mynsiem, ki jingpang dap shadem, jyrhoh, sahiaw, tuberculosis (TB), ki jingpang ha ki tyndong pynmih sur ha ki rukom bapher bapher, bampong ha ki tor bad shyntur.
U briew uba dih sikret manla ka sngi u pynlut antad T. 1192 spah manla u bnai. Lada ka jingkyrni dih bad bam duma ka neh kumne, ka lah ban dkhat noh shiteng rta ïa shi bilian ngut ki briew ha ka pyrthei baroh kawei tang ha ka Spah Snem kaba Arphew-wei.
Ka National Tobacco Control Programme (NTCP), NHM ka la sdang ha Meghalaya ha u snem 2013-14 hapoh ka Plan San Snem kaba 12 bad ka thong ka long ban khanglad ïa ka jingsdang mad/dih duma ha ki samla bad kiba la san, ban pynshlur ïa ka jingpynduh dih/bam duna ha ki samla bad kiba la san, ban pynduh ïa ka jingring mynsiem ïa ka tdem duma (second hand smoking), ban pynduna ïa ka iew die duma lynba ki IEC campaigns, khanglad ïa ki antor kiba pynbna paidbah ïa ki duma bad kiwei de bad ban pynduna ïa ka jingpynmih duma da kaba khanglad ïa ki khynnah ba kin ïoh ïa u.
Ka Sorkar Meghalaya ryngkat bad ka NTCP ka la shim ki sienjam ban pyntreikam ïa kine ki prokram. La thaw ïa ka State Level Coordination Committee (SLCC) bad ki District Level Coordination Committee ka ban kynthup ïa bun ki tnat treikam.
Ka Section 4 jong ka Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 2003 lane COTPA, 2003 ka mana ban dih sikret ha ki jaka paidbah. Ka Section 6A ka mana ban die duma sha ki khynnah bad da ki khynnah. Ka Section 6B ka mana ban die duma hapoh 100 mitar na ki skul. Bad na ka bynta kane, ki Enforcement Squad bad ki khlieh jong ki jaka pule ki don ka bynta kaba khraw ha kane ka jingpyrshang. La pynlong bun tylli ki prokram pynsngewthuh ha ki skul jong ka nongbah ban ai ka jingtip shaphang ka jingsniew jong u duma bad ban pynshlur ïa ki khynnah ba kin raikut ban nym bam ne dih duma.
Ïa ka World No Tobacco Day yn sa rakhe ha ka 31 tarik mynta u bnai halor ka phang, “Tobacco and Lung Health” lane “u Duma bad ka Jingkhiah krat ki Tor.”
Ka thong kaba hakhmat eh ka long ban pynshai paidbah ïa ka jingpynsniew u duma ïa ki tor, naduh ka jingbam bampong haduh ki jingpang kiba shong ha ki dkhot met ba ring bad ba pynhiar mynsiem.