Press "Enter" to skip to content

2 bnai khlem bording bad umbam umdih hapoh ka PHC ha Mawhati

Nongpoh, Jylliew 11: Haba shimkhia ïa ka jingujor kaba la ioh na ki paidbah kiba sah ha ka thain Mawhati, hynne ka sngi ki nongïalam ka HYC ha Ri Bhoi, ki la leit ban jurip ïa ka Mawhati PHC bad ha katei ka jingjurip, la lap ba katei ka PHC, ka la don hapdeng shibun ki jingduna, kata ka long naduh ka jingbym biang ka umbam umdih, ka bording lem bad kiwei de ki jingdonkam ha katei ka Hospital.
Ha ka jingjurip kaba la ïalam da u Bah Hercules Suting, General Secretary ka HYC ha Ri Bhoi lem bad ki dkhot ka HYC Mawhati, ki la ioh ban ïakren bad ki nongtrei hapoh katei ka PHC, ha kaba ki la ioh jingtip ba katei ka PHC, ka la shah iehnoh bein shaba palat bad kaba la wanrah jingeh ym tang ïa ki paidbah, hynrei wat ïa ki nongtrei ha katei ka PHC ruh kumjuh.
Haba pyntip sha ki nongthohkhubor, u Bah Hercules Suting, u la ong ba ka seng kam lah khlem da pynrem ïa ka sorkar jylla bad ïa ka tnat ka koit ka khiah, namar ka jingbymshimkhia ha ka ban wanrah ïa ka bit ka biang hapoh katei ka PHC, kaba la wanrah jingeh ïa ki paidbah kiba leit ban shah sumar ha katei ka PHC.
U la ong ruh, ba ka seng kam lah khlem da pynpaw lem ïa ka jingsngewkhia ban tip ba katei PHC kaba ai jingshakri ïa ki palat 42 tylli ki shnong, hynrei kan ïakynduh jingeh halor ka jingbym don bording bad um mynta ka 2 Bnai kynthih, kumjuh halor ka jingbymdon u Doktor MBBS, namar kumba mynta la peit ïa katei ka PHC da uwei u Doktor Ayush.
Kumta haba ïadei bad kitei ki jingduna hapoh katei ka PHC, ka seng kan sa shimkhia ha ka ban leit kynduh ïa ki bor ba kham shalor bad kin sa leit ban pynsngew wat sha u Bah A.L Hek, Myntri ka tnat ka koit ka khiah hapoh ka jylla, u la bynrap.