Press "Enter" to skip to content

Ba thmu da ka University mih da ka College, thoh u MLA sha u CM

Shillong: U MLA jong ka Mawphlang, u Bah SK Sunn, u la pynpaw ka jingsngew khia bad thoh sha u Myntri Rangbah ka jylla, u Conrad Sangma halor ka jingbymshai ka Central Agriculture Univeristy (CAU), kaba la thmu ban seng ha Meghalaya.
Ha kine ki khyndiat sngi baladep, u Myntri ka tnad rep, u Bah Banteidor Lyngdoh, u la ïathuh ba ha ka jingshisha ka sorkar ka la pan da ka University, hynrei ka la ïoh pynban da ka College. Hynrei u la ong ba ka sorkar kan nym shongthait tad haduh ban da ïoh kumba la pan.
Na ka liang u Bah Sunn, ha kane ka jingthoh ba u la phah sha u Myntri Rangbah,u la pynkynmaw ba ha ka Dorbar Mangtyngka ha ka 17 tarik u ïaïong u snem baladep, u la wanrah da ka jingkylli halor kane ka University. U Myntri ka tnad rep hapdeng kiba bun ki jubab, u la ong ba ka jingtrei halor ka University ka la ïaid shaphrang.
Hynrei u Bah Sunn, u la ong ba naduh katei ka por, u la pynpaw ka jingartatien ba ka jylla kan ïoh ïa ka University na ka daw ba ym ïoh ïa ka jaka kaba long katkum ka jingkwah ka tnad treikam jong ka sorkar pdeng.U la pynkynmaw ruh ba ha ka 3 tarik u Rymphang 2010, ka sorkar India lyngba ka Ministry of Agriculture bad ka DARE, ka la thung da ka Committee ba kynthup saw ngut ki dkhot bad ïa kane la khlieh da u Dr. SN Puri, Vice Chancellor Central Agriculture University, Imphal na ka bynta ban jied ïa ka jaka ban buh ïa ka CAU ha Meghalaya. Ha u Jymmang 2010,ka Committee ka la jied ïa ki artylli ki jaka. Kawei kadei ha Kyrdemkulai kaba mar khap bad ka Kharsati Park bad kumjuh ruh ha jaka jong ka MeSEB ha Umiam, markhap bad ka ICAR. Kine ki jaka ki long ki artylli ki jaka treikam, ha kaba kan don ka Main Canpus, ka Headquarter bad kiwei kiwei.
Ha kajuh ka por u MLA Mawphlang, u la pynpaw ba naduh katei ka por u la pynpaw ruh ka jingartatien ba imat ïa ka jingthmu ban tei ïa ka University la pynduh noh bad katei ka jingtrei ha Kyrdemkulai kaba mynta la tip ba kadei tang ka College, kadei kaba hap hapoh ka CAU Imphal. Hynrei na ka liang u Myntri ka tnad rep, u la pynthikna ba kadei jong ka CAU bad ka kam ka la nang ïaid shaphrang.
Kumta na ka liang u Bah Sunn,u la kyntu ïa u Myntri Rangbah ban shimkhia ïa kane kumba la pynpaw da u Myntri ka tnad rep ba ka Meghalaya kam dei ban duh ïa ka lad ban ïoh ïa kane ka skul bah na ka bynta ka rep ka riang.