Press "Enter" to skip to content

Bym ïahap rukom treikam, pynduh noh ka HANM ïa ka Women’s Wing

Shillong, Jylliew 11 :Ka Hynñiewtrep Achik N ational Movement (HANM) ha ka sngi Ba-ar ka la pynbna ba la pynduh pyndam noh ïa ka Women’s Wing halor ka nongrim ba kim sngew tynnad ïa ka rukom treikam jong ki.
Haba kren bad ki lad pathai khubor, u Genera Secretary ka Seng, Bah Bobby Basaïawmoit u la ong ba ka jingpynduh pyndam noh ïa ka Women’s Wing hapoh ka jingïalam jong i Kong Betty Jyrwa kadei ruh hadien ba ki ïohi ba katei ka tnad kam shym la donlang ha ki ishu kiba ïadei bad ka Jaidbynriew khamtam ha ki ishu kiba dang shu lah shen watla na ka liang ka Seng Kmie ka ju pyntip man ka por ïa ki.
Na ka liang u President, Bah Lamphrang Kharbani haba bynrap lang u la ong ba watla ki don bun ki daw tangba kim kwah ban thad rong ïa la ki para dkhot. “Ngim lah ban len ba ka Women’s Wing ha ki snem ba la dep ka la trei borbah ha ki thaiñ Killing, hynrei hadien pat la mih bun ki jingujor khamtam haduh ba kam don shuh ka jingsngewthuh jingmut hapdeng ki para nongtreikam,” u la ong.
Na ka liang ki nongïalam ka HANM, haba bynrap lang ki la ong ba kum ka seng hi ka khlem ithuh shuh ïa i President ka Women’s Wing, Kong Betty naduh ba i mih ban ïakhun elekshon ba la dep halor ka nongrim ba im shym la kynjoh ktien na ki nongïalam ha shwa ba kin ryngkoh sha ka saiñpyrthei.
Ha katei kajuh ka sngi, ki nongïalam ka seng ki la ïathuh ruh ba ki la leit ban kynduh ïa ka Deputy Commissioner ka East Khasi Hills ba kan ym pdiang satia ïa ki Circle bad Unit jong ka seng kiba thmu ban wan rejistar noh ïa ka HANM kum ka kynhun hapoh ka sorkar. “Ngi la buh da ka jingthoh ba ka ophis na DC kan ym shah satia ban pynkylla seng myntoi sorkar namar ka HANM hi kadei ka sengbhalang,” la ong u General Secretary. Shuh shuh u la ong ruh ba kim pyrshah ïano ïano lada ki kwah ban mih noh na ka seng hynrei kin ym ailad pat ba kin rejistar noh ïa ka pat kum ka kynhun ban myntoi na ka sorkar.
Katkum ka jingong jong u, katei ka Circle kaba thmu ban rejistar noh ïa ka HANM hapoh ka sorkar kadei na ki thaiñ West Khasi Hills.
Ha kajuh ka por, ki nongïalam ka Seng ki la ong ruh ba ïa mynta hi ka Anti Influx Operation Cell ba ki thaw kan ap shwa ïa ka lai taïew ba ki bor distrik ki pan por.