Press "Enter" to skip to content

Ioh mynsiem ki samla ïalehkai

Ka rai ka kynhun myntri ha ka jingïalang ba la long ha sorbah Tura ba kan khreh pdiang ne ban sdang ban pyntrei kam ïa ka ‘Sports Policy’ ha ka jylla, ka long shisha kawei na ki jingai mynsiem ïa kiba bun ki samla ïalehkai, khamtam lei lei ïa kito kiba kham paw ne pyntbit ïalade ha ki jingïalehkai ba la ithuh ha ka Olympic ne ki Olympic Discipline, namar dei lyngba ka jingpyntrei kam ïa ka sports policy, ba ki khun samla ka jylla kin lah ha kaban pynleit jingmut pat ïalade ha ka jingim ïalehkai ba man la ka sngi ka jong ki.
Lehse ka jingthmu ka sorkar jylla ka dei kaba la dep ban mait phang naduh kaba sdang da kawei pat ka sorkar, hynrei sngewtynnad pat ban shem ba ia kane kamat treikam mynta ka kynti la thmu noh ban pynurlong ïa ka, naka bynta ban tei shuh shuh ïa ka bha ka miat jong ka jingim ïalehkai ki khun samla jong kane ka jylla.
Da ka jingpdiang ka kynhun myntri jong ka sorkar jylla, sngew ban pynpaw hangne ba kum ki samla, ka por ka la dei pat ïa ki ban nym ïalehkai shuh ha ka jingim, namar lada pyntrei kam ïa ka sports policy, ka lad kamai ne ka lad ban kynjoh sha ka thong kan nym long shuh kumba ka long mynta, pynban ha kino ma kino ki jait jingïalehkai ba ki khun samla ki don ha ki ïa ka sap, ki la dei ban kut jingmut ban trei shitom na lade khnang ban lah naka bynta ban rah ïa ka nam ka burom ïa la ka ïing ka sem ka kur ka jait, ïa ka jylla bad ïa ka ri hi salonsar.
Hynrei kum ka jylla, ka donkam ruh ba kan don ïa ki briew kiba len lade bad ba trei shitom haba ki shim ïa ka lyngkor ban long kum ki nongïalam ïa ki synjuk ïalehkai, namar kham bunsien, don ki nongïalam kiba bun ki khep ki pyrshang ban ïalam bakla bha ïa kiba bun ki khun samla, da kaba ki ïaleh ban kyntur jubor ïa ki ban kdat ïa la ka jingim ïalehkai sha ki bynta kiba kum ka ri kam pat lah ba kan pdiang ne ban ithuh pura ïa ka, nalor katta ba ki ïaleh wat ban pynsngewthuh bakla wat ïa ki paidbah da ka jingkam ka jong ki ba ka jingïalehkai ba ki la seng ne long nongïalam, ha kane ka jylla kidei kiba la paw bha, hynrei lada wad bniah pat baroh kidei ki bym don nongrim.
Toi ha ka jingim ym baroh ba lah ban don beit ïa ka juh ka sap, hynrei kum ki khun samla, haba ka sports policy ka thmu ba kan treikam ha kane ka jylla, na lade ki donkam ban spel ne pule bniah ïa ka, kumno ka batai, shano kan ïalam bad ïa ki jingïalehkai kiba kumno la pruid dak bha ha ka liang ban pyntrei kam ïa ka ha kane ka jylla. Kumta ki khun samla kiba don ka sap ha ki kam ïalehkai nangne shakhmat kin hap ban long kiba husiar bad peitngor bha ïa la ka jong ka jingim, ba kim dei ban shah ïalam bakla pynban na lade kidei ban long kiba shemphang bad kiba nang ban jied ïa ki jait jingïalehkai kiba kumno ba kin lah ha kaban shim ha ka jingim ban pynjanai pura pat ïa ka.
Shuh shuh kum ka sorkar jylla, ka mat ba ka donkam eh ha shwa ba kan jam shakhmat ha kaban pyntrei kam ïa kane ka sports policy ka long ba kam dei ba kan kdup lut ïa baroh, ka donkam ba kan da khmih ne wad bniah, ha ki jait jingïalehkai kiba kumno, ba ki khun samla ki kham smat ban ïashim bynta bha, la kita ki jingïalehkai kidei pat kiba da ioh ïa ka jingithuh kaba pura na ki bor ba dei khmih jong ka sorkar kmie, ne ki wan na ki kynhun ne synjuk, kiba da tikna, lada don kino kino ki bynta kiba ka sorkar jylla ka sngew artatien, mardor ka lah ba kan ieh noh shwa ïa ki shadien, hynrei ban ïaleh shwa ban phai ïa la ki jong ki khmat sha ki jingïalehkai kiba kum ka jylla ka don ïa ka buit ne ka bor ba kan lah kem ban saiñ dur ïa la ki khun samla ba kin paw lem shakhmat ha ka jingim.
Nalor katta lyngba ka sports policy, ka thong ba shah eh hakhmat ïa ka jylla ka long da kumno ba kan lah ban bhah mar biang ïa ka mang tyngka ïa ki synjuk ïalehkai, ha kaba kan donkam bha ïa ki synjuk ïalehkai kiba don ha kane ka jylla ban thaw na lade ïa ki lad ki lynti da kumno ban lah ban pynmih ïa ka pisa bad ïa kaba duna pat ban sa pan ïarap na ka sorkar jylla, namar ka jingthmu ban pyntrei kam ïa ka sports policy ym lah ban ong ba dei tang ka sorkar jylla kaban shim ïa ka lyngkor ban pyndap mar biang lut ïa baroh ki synjuk ïalehkai, kaba lada long pat kumne ka thong pyntrei kam ïa ka sports policy ha kane ka jylla kan nym lah satia ba kan poi shano shano ruh.
Ïa mynta kum ki samla, ki dei ban ai khublei ia ki sorkar barim bad ïa kaba mynta, kiba la tur shakhmat naka bynta ban kner lem ïa la ki jong ki kti ban khreh ban ïarap ban saiñ dur ïa ka jingim ïalehkai kaba pura, ka por ka la donkam ïa ki paidbah nong shnong ba kin shim lem ïa ka lad ka lynti da kumno ban btin lynti ïa la ki khun samla ba kin lah ban kynjoh lem sha ka thong jong ka jingim, da kaba ïalam ne ïarap ban btin lynti ïa la ki khun samla ba kin kdat noh ka jingim kaba shu li-li-pen-pen, hynrei ban wan shakhmat ban pynpaw ïa ka sap nylla kaba ki don ha ka jingim, nalor katta ym donkam shuh ban dang ud ne khnium ba ka sports kam wanrah jingmyntoi, pynban donkam ban im sngi ban minot ne ban trei shitom khnang ba ka sap nylla kaba don ha ka jingim, kan mih paw bad ba kan tyngshaiñ hakhmat jong ka pyrthei.