Press "Enter" to skip to content

Jurip u Conrad ïa ka jaka ban tei ïa ka Indoor Stadium ha Dalmagre

Buh thong ban pyndep shwa ka NG 2022

Shillong, Jylliew 11: U Myntri Rangbah ka jylla u Conrad K. Sangma, hynne ka sngi Hatmajai jong ka taiew u la leit ban jurip ïa ka jingtei jong ka Muliti Utility Indoor Stadium kaba don hapoh Dalmagre , kaba don markhap bad ka sorbah Tura.
Ha kane ka jingleit jurip, la synran lang ïa u Conrad K. Sangma da u James K. Sangma, myntri ba dei khmih ïa ka kam pohïing, bah Banteidor Lyngdoh myntri ba dei khmih ïa ka tnat sports.
Kane ka indoor stdium, la thmu ban tei ïa ka da ka sorkar jylla, kum shi bynta ka jingpynkhreh ban pynlong ïa ka National Games ha u snem 2022.
Nalor katta la thmu ruh ban shna ïa ka surok four lane, kum shi bynta ban pynïasnoh ïa kane ka shnong bad ka sorbah Tura.
Kiwei kiwei ki riew pawkhmat ba la synran lang ki kynthup ïa u Thomas A. Sangma, MLA Marcus N. Marak, Government Chief Whip bad kiwei.
Nalor katta u Conrad u la lum ruh ïa ka jingïalang jong ki rangbah ka shnong bad ki trai jaka ban pan na ki ïa ka jingïatrei lang naka bynta ka jingïaid beit ïaid ryntih jong ka kam khnang ba yn lah ban pyndep ïa ka kat kum ka por kaba la buh.
Ka jingleit ban jurip ka long ryngkat ka jingïadon lang ki heh ophisar jong kiba bun tylli ki tnat kiba don bynta ha kaban pyntyllun ïa ki kam kiba ïadei bad kane ka jingtei.
“Ki nongshong shnong bad trai jaka ki pynpaw ka jingsngewkmen ban ai jaka na ka bynta ban tei ïa ka Games Village bad ka Indoor stadium khlem da siew pisa eiei hynrei ki la pynpaw katto katne tylli ki mat dawa ban kyntiew ïa ka roi ka par ha ka shnong jong ki,” ong u Conrad.
U Myntri Rangbah u la pynpaw ba lada ka don ka pisa lah ban tei da ka Outdoor Stadium ruh bad shen ka Sorkar Jylla kan leit kynduh ïa u Myntri Rangbahduh ka Ri India, u Narendra Modi, ban pyn-sngew ha u ïa kine ki jingdonkam.
Halor ka jingkren ki nongpeit pyrman kiba kam ba ka Sorkar Jylla kan ym lah ban pyndep ne pynbiang ïa ki jingdonkam shwa ka National Games, u Conrad K Sangma u la ong, “ym don kano kano ka jingartatien bad ngin pdiang ïa la National Games ha u 2022”.
“Ha u snem ba la dep ngi la trei minot ban pynbiang ïa ki jingdonkam baroh kum ha ba wad jaka, ban pynwan dur bad ha ki bnai ban wan lehse kin mih noh ki mang tyngka,” ong u Myntri Rangbah.
Hadien kane u Myntri Rangbah bad u Myntri ka tnad Sports lem ki MLA bad ki ophisar ki la ïaid na ka shnong Dalmagre haduh ka jaka ba don ka kshaid Pelga ban jurip la ka lah ne em ban shna ïa ka surok na kane ka bynta kaba kham jan watla hap ban shna jingkieng ka wah.
Ha kane ka jingïaid kjat ban jurip ïa ka surok ban pyniajan ïa ka Games Village bad ka Dalmagre, ki la hap ban klan ïa ka wah bad lap ba kane ka jaka kaba itynnad bha bad kaba lah ban khring ïa ki nong jngoh kai pyrthei.
U Myntri Rangbah u la ong ba lada ka don ka jingmynjur ban shna ïa ka surok na kane ka bynta jong ka thaiñ kan lah ban khring ïa ki nongwan jngohkai pyrthei ban wan jngohkai ïa kane ka wah kaba don ïa ka kshaid Pelga. Kumba long mynta ïa kane ka Wah la hap ban shu pun da ka jingkieng siej watla ka khim bad ym pat lait kali satia.