Press "Enter" to skip to content

Kem ka Seng Kynthei Lapalang ïa ki nongkhaii drok, kurup bun synduk ka kyiad

Shillong, Jylliew, 11: Ka Seng Kynthei jong ka shnong Lapalang, Shillong, mynta ka step sngi baar ka la ïohkem arngut ki snar khaii drok kiba ju mlien ban pynïaid iew ïa u drok sha ki khynnah samla jong ka shnong Lapalang bad kiwei kiwei ki shnong ka sor shillong.
Katkum ka jingïathuh jong ka President ka Seng Kynthei jong ka shnong Lapalang, ka Kong Kelin Sohshang, ïa kine ki arngut ki snar khaii drok la ïohkem hadien ba ka seng kynthei ka la buddien bad pynap shrip la slem bha namar ka jingishan khmat ïa ka ïaid ka ieng jong ki hapoh shnong.
“Hadien ba ngi la syntiat bha ïa ka ïaid ka ieng jong ki, mynta ka sngi ha ka por 8:30 baje eiei mynstep ngi la ïohkem ïa uwei u Nepali bad uwei u Mizo kiba wan shongwai hapoh kane ka shnong bad kiba ju mlien ban die drok hapoh ka shnong Lapalang,” ong ka Kong Sohshang.
Hadien ba ladep tohkit, ka seng kynthei jong ka shnong Lapalang, ha ryngkat ka jingïadonlang jong u Rangbah Shnong u Bah J. Hynñiewta, ka la aiti noh ïa kine ki arngut sha ki Pulit ka Rynjah Police Station ban pynngat ïa ki hapoh ki kyndon aiñ.
Ha kane kajuh ka sngi, ha ka por janmiet ka Seng Kynthei ka la ïoh kurup pat bun bah ka kyiad phareng ba la pynïaid iew be-aiñ da kawei ka Nepali ba la tip kyrteng kum ka Sunita Thapa.
Ka President jong ka Seng Kynthei, ka Kong Kelin Sohshang ka la ïathuh ba ki dkhot ka Seng Longkmie katba ki dang ïaid pahara hapoh shnong ha ka por kumba 6:30 eiei janmiet ki la lap ksai ba kane ka Nepali ka ju pynïaid iew be-aiñ ïa ka kyiad hapoh u pud u sam jong ka shnong wat hapdeng ka jingmana batyngeh jong ka Dorbar Shnong ban die kyiad be-aiñ hapoh shnong.
“Ngi la ïoh kurup bun synduk ka kyiad na ka iing jong ka Sunita Thapa, kaba shongwai la 20 snem tam eiei hangne ha shnong Lapalang mynta ka janmiet ha ka por kumba 6:30 baje janmiet,” la ïathuh ka Kong Sohshang.
Ïa kane ka kyiad ba la ïoh kurup da ka Seng Kynthei la sakhi lang da ka jingïadonlang u Rangbah Shnong u Bah J Hynñiewta bad ki dkhot ka Executive Committee jong ka shnong Lapalang.
Kum ban shu kdew hangne, ka Seng Kynthei Lapalang naduh u snem 1998 ka la lah ban pynduh thiaw ïa ka jingdie kyiad be-aiñ hapoh ka shnong da kaba khang khyrdep haduh 23 tylli ki dukan die kyiad be-aiñ hadien ba la ïohi ïa ka jingkylla lyngkar jong ki longkpa bad samla shynrang na ka jingdon jong kine ki dukan die kyiad be-aiñ hapoh ka shnong.