Press "Enter" to skip to content

Na ïing skum sha ïing dewbilat hadien 34 snem ka skul Seiñduli

Nongstoiñ, Jylliew 11: Hadien ki 34 snem tam jong ka jingïaid lynti ban shakri bad tbeh jingshai lyngba ka pule puthi, ka Seiñduli Lower Primary School ka la ïoh mynta ïa ka ïing skul kaba la tei da ka cement lane ka ïing building.
Baroh shikatta ki snem jong ka jingïaksaid ban tbeh ïa ka jingnang jingstad ha ka thaiñ, katei ka skul ka la shakri da kaba ker bad shna ïa ka skul da ka ïing skum. Hynrei lyngba ka jingtrei borbah jong u MLA Bah Gigur Myrthong, katei ka skul ka la kup pat ïa kawei ka dur ba thymmai.
Haba kren ha ka jingïalang plie ïa katei ka skul building ha ka sngi ba ar, I Kong Iorlis Syiemlieh nongseng ïa katei ka skul I ba dei ruh I Head Teacher, I la pynpaw ïa ka jingsngewnguh ïa u MLA bad ong ba ka la shim por tang 8 phra bnai naduh ba pan jingïarap, hynrei ka kam ka la ïaid shaphrang.
I la pynpaw ruh ba la seng ïa kane ka skul naduh ka 8 tarik Rymphang 1985 bad ha kaba sdang nyngkong eh ïa kane ka skul la shu hikai ha ka ïing dorbar jong ka shnong. Ha u snem 1992 u bah Phirik Lyngdoh u la ai khyndiat I bynta jong khyndew I ba don harud surok PWD bad ha u snem 2010 ka Managing Committee ka la ïohi ïa ka jingbym shngaiñ jong ka jaka bad ka la sdang bad wad jaka shawei pat kaba long kham pajih na ka surok Highway. Hynrei namar ka jingbym ïoh jaka, I Kong Iorlis Syiemlieh I la ai sngewbha noh ha ka kper jong I. Haduh u snem 2018 la shu shna tang da u skum ïa katei ka skul bad dei tad haduh u bnai Rymphang 2019 ba u MLA ryngkat ka ïing jong u ki la pynshna hi ïa katei ka skul ym da ka scheme.
Kumba long mynta, kane ka skul ka don haduh ka Class kaba San, 2 ngut ki nonghikai 2 ngut ki nongïarap bad la siew ha ka dor kaba tang 1000/- shi bnai bad ki khynnah skul mynta ki don haduh 80 ngut.
Ha ka jingïalang plie ïa kane ka skul building, la donlang ruh da u Kongsan Ma Lakmen Rymbui Myntri ba dei peit ïa ka pule puthi ha ka Jylla, u Bah Gigur Myrthong local MLA, ki kmie ki kpa jong ki khynnah skul, ki riew rangbah jong ka thaiñ bad la pynïaid ïa katei ka jingïalang da I kong L.Syiemlieh Deputy Inspector of School West Khasi Hills District.
Na ka liang u Kongsan haba kren ha ka jingïalang, u la ong, “Ka sorkar ka shem jingeh ban pynbiang lut ïa baroh ki jingdonkam. Hynrei nga sngewkmen ban tip ba na ka liang jong u MLA bad ka ïing jong u ki la shna hi ïa kane ka skul bad kane ka jingleh jong u MLA kan ai mynsiem pat ïa kiwei ki rangbah la ki dei kiba don hapoh ka saiñ hima sima ne ki riew shimet bad ki riew trei mon sngewbha, khnang ba ngin lah ban kyntiew ïa ka pule ka puthi”.
U la ong ruh, “Kumba la long haduh mynta ki jaka pule puthi hapoh ka jylla kim da dei eh tang jong ki bor sorkar. Hynrei ki dei na ki riew shimet ki seng treimon sngewbha bad khamtam ki bor Balang bad ngim lah ban khlem da ai khublei ïa ki bor Balang, ki bor shnong kiba shim ïa ka jingkit khlieh na ka bynta ban pynïoh ïa ki jaka pule puthi” bad bynrap, “Ki don ki nongmihkhmat kiba leit tang ban mih khmat, hynrei don ruh kiba don ïa ka mynsiem kiba wad ïa ka lynti kumno ban kyntiew ïa ka dong bad ka thaiñ bad I bah Gigur I dei iwei na ki bad mynta I la pyni syndon da ka dak hangne bad na ka liang jong nga ruh ngan ai ka jingïatreilang”.