Press "Enter" to skip to content

Pynskhem u Syiem ïa u Bah R.M Dorphang kum u Sordar ba pura ka Raid Kyrdem

Nongpoh, Jylliew, 11: Hadien ba ki paidbah ka Raid Madan Kyrdem ki la dep ban jied dang shen ïa u Bah R.M Dorphang kum u Sirdar ka Raid Madan Kyrdem, na ka liang u Syiem ka Hima Khyriem, u Paiem Balajied Syiem mynta ka sngi u la leit ban pynkup burom ïa ka spong ka phalli ïa u Bah R.M Dorphang kum u Sirdar ba pura ka Raid Madan Kyrdem.
Ha kane ka jingpynkup burom bad pynskhem ïa u Bah R.M Dorphang kum u Sirdar ba pura ka Raid Madan Kyrdem la sakhi lang ruh da ka jingdon lang u MLA ka Umroi, u Bah George B. Lyngdoh uba la shim bynta kum u symbut kongsan, u MDC ka Umroi, u Bah R.R Kharbuki, ki Rangbah Shnong na ki shnong bapher bapher ka Raid, ki riew rangbah ka Raid Kyrdem bad khamtam la sakhi ruh da ka jingdon lang ki khun ki hajar na ka Raid Madan Kyrdem.
Ha kaba shimti kum u Sirdar ba pura ka Raid, nalor ka spong ka phali ba la pynspong da u Syiem la leh burom ruh ïa u Bah R.M Dorphang da ki syntiew ki skut bad ki jain spong kaba long ka jingaibor bad ka jingshimti ïa ka kam na ka bynta ban kit ban bah ïa ka eh ka shon ka Raid bad ruh ban pynneh pynsah ïa la ki riti ki dustur.
Haba kren ha kane ka sngi, u Bah R.M Dorphang kum u Sirdar ba thymmai ka Raid Madan Kyrdem u la pynpaw ka jingkmen ba ki paidbah ki la pynkhamti ïa kane ka kam kum u Sirdar bad u khmih lynti ruh ba da ka jingïatrei lang ki paidbah yn dang lah ban kyntiew ïa ka bha ka miat bad ka roi ka par ki paidbah haph ka Raid Kyrdem.
Na ka liang u Syiem ka Hima Khyriem, u Paiem Balajied Syiem u la ai ka jingkhublei kaba kyrpang ïa u Bah R.M Dorphang kum u Sirdar ba la jied da ki paidbah ka Raid bad ha kawei pat ka bynta la kyntu ba un shim kata ka jingkithlieh ym tang na ka bynta ka bha ka miat bad ka roi ka par ki paidbah hynrei khamtam ban pynneh ïa la ki riti ki dustur kaba long kawei na ka bynta ban pynkhlaiñ ïa ka jintehhsong ka jaid bynriew.
Ha kawei ka bynta u la kyntu ruh naduh ki Rangbah Shnong, ki riew rangbah bad ruh ki paidbah ka Raid ba ki dei ban ai ka jingïatrei lang na ka bynta ki kam shnong bad ruh ki kam jong ka Raid, namar dei lyngba ka jingïatrei lang lah ban kyntiew ïa ki Shnong ki thaw bad ka Raid hi baroh kawei, u la bynrap.
Kiwei kiwei kiba la ai jingkren ki kynthup ïa u MLA ka Umroi, u bah George B. Lyngdoh, u MDC ka Umroi, u Bah R.R Kharbuki bad kiwei kiwei ki riew rangbah, ha kaba da kawei ka sur ki la pynpynpaw ba donkam ka jingïatrei lang bad ka jingïatylli na ka bynta ban kyntiew ïa ka bha ka miat bad ka roi ka par jong ki paidbah hapoh ka Raid.