Press "Enter" to skip to content

Pynsuki ka Agriculture ban thung kam ha ki 57 tylli ki kam ba thylli

Shillong, Jylliew, 11: Ka Meghalaya Agricultural Students and Graduates Association (MASGA) kaba la pan jingtip lyngba ka Right to Information (RTI) ka la lap ba ki don haduh 57 tylli ki post ba lait thylli hapoh ka tnat Agriculture jong ka Sorkar Jylla.
Ka MAGSA ha u kyrwoh ka la ong, “katkum ka jubab RTI kaba ‘vide letter no. AGRI(E)68/2015/82, Dated Shillong the 28th June 2016” ka pynpaw ba ki post ba lait thylli kat haduh ka 31 tarik u Jymmang, 2015 ki don 57 (ne bun namarba ka jubab RTI kam da long kaba shai) kaba pyni ba ki don bun tylli ki post kiba lait hapoh kane ka tnat.”
“Ka MASGA ka kwah ban buh jingkylli ïa kane ka tnat treikam jong ka Sorkar Jylla ba kan pynstet noh mardor ha kaba ïadei bad ka jingthungkam shwa ba ki samla pule kiba la pyntbit ïalade ha ka laiñ pule ïa ka tnat Rep kin kut noh ka rta rungkam lane kane ka tnat kan hap ban shim ïa ka jingkitkhlieh lada ka seng ka shim da kiwei pat ki lad ki lynti,” la byrngem ka seng.
Ka Seng ka la pynpaw ïa ka jingsngewkhia ïa kane ka jingleh jong ka Sorkar Jylla ha kaba ïadei bad ka thungkam thungjam ha ka tnat Agriculture jong ka Sorkar Jylla.
“Ka MASGA ka la leit ïakynduh ruh bun sien ïa u Myntri ka Rep ka Riang bad ïa ki Ophisar jong kane ka tnat bad pynlong ruh da ka jingïashong kyllaiñ mynngor ha ka 9 tarik u Nailar, 2018 ban pynsngew sha kane ka tnat ïa ki jingdawa, hynrei ka tna kam shym la lah satia ban shim ïa kino kino ki lad ki lynti. Naduh u snem 2007-08 ka tnat kam shym la pynlong satia kano kano ka jingthungkam,” ong shuh shuh u kyrwoh.
Ka Seng ka kwah ban tip shai kiei ki daw kiba pynlong ïa ka jingpynsuki bad ka jingpynslem ban thungkam hapoh kane ka tnat.
“Ka Iingbishar Meghalaya High Court ha ka 24 tarik, Lber, 2015 lyngba ka hukum kaba “vide case no. WA. No. 10/2015” ka la pynkut ïa ka jingthungkam kaba khatduh na ka daw ka jingbymïahap ha ka rukom thungkam bad bthah ban pynlong biang ïa ka eksamin na ka bynta ki 16 tylli ki Post ha u bnai Risaw, 2018 hynrei ïa ka resol ym pat lah satia ban pynbna paidbah haduh mynta,” ong shuh shuh u kyrwoh.