Press "Enter" to skip to content

Shah thang ki ïing trep hapoh Resort u Chairman barim ka ANVC-B

Shillong, Jylliew 11 : Ki runar bym lah ban ithuh ki la leit wiang ding ïa ki ïing trep ba la thaw hapoh ka Resort jong u Chairman ba rim ka ANVC-B u Rimpu N Marak kaba don shabar jongka nongbah Tura bad kane ka la jia ha ka por miet Lah Sngi U Blei.
Halor kane ka jingjia na ka liang u Rimpu u la leit ai ka jingujor ejahar sha ki pulit ha kaba u la kynnoh ba ïa kane ka kam la leh da ka kynhun jong ka GSU hapoh ka jingïalam u Tengsak, ki dkhot ka ADE bad FKJGP.
Katba na ka liang ki nongïalam jong kine ki seng pat ki la kyntait mardor halor kane ka jingkynnoh u Rimpu da kaba kynnoh kylla ïa u ba u dei pynban u nonglum pisa jubor na ki dukan thoh tim ha Tura bad lehse na katei ka daw sa jia katei ka jingshah thang kitei ki iing trep hapoh ka Resort jongu.
Na ka liang ki bor Pulit ki la register case halor ka ejahar ba la ujor da u Rimpu bad ka jingtohkit ka la sdang.