Press "Enter" to skip to content

Khlad noh u Tymmenbasan ba shah tynrah kali

Khliehriat Jylliew 13:U Bah Arles Rymbai,uba dei ruh u Tymmen Basan jong ka Balang Presbyterian Moobakon West Jaintia Hills uba ju ïarap ruh ïa ka Balang Presbyterian Lumshnong kum u nongïalam a ka Choir Lumshnong u la khlad noh ha ka jingïa tyngkhuh kali mynta ka sngi ha National Highway Umtyra ha ka por kumba 2.30 mynsngi.
Ha katei ka jing jia ba shyrkhei la ong ba kawei ka trok ba la niah da u Rijoy Siangshai,kaba don u number ML-11-5032 kaba wan na Khliehriat ka la leit tynrah bad tur beit ïa ka kali Alto ba niah u Tymmenbasan Rymbai kaba don u registration Number ML-04-B-6303 katba utei u TymmenBasan u dang mut ban kiew sha Khliehriat.
La pynkit noh mar mar sha Khliehriat CHC ha kaba u la khlad noh tang hadien kyndiat por namar ka jur ka jingmynsaw.
Ki khubor na ka liang ka Balang Presbyterian Lumshnong ki ong ba ka jing leit on tep ïa u kan long la shisngi ka 15 tarik ha u Lumjingtep jong ka Balang Presbyterian Moobakon (Khanduli-West Jaintia Hills) ha ka por 12.00 mynsngi.
Kumjuh ruh na ka liang ka Balang Presbyterian Lumshnong ki la pynpaw ka jing sngewshih bad ka jing duh kaba khraw halor ka jing khlad noh u Tymmenbasan Arles Rymbai uba long ruh u nongialam ba shitrhem jong ka Choir Balang Lumshnong.
Khlad ba hap kali:Ha kawei pat ka jing jia aksiden ha Lumshnong la ong ba u Lius Rymbai,38 snem,uba na ka shnong Moobakon West Jaintia Hills uba niah ia ka trok dumper ML-11-1669 u la khlad noh ha shen ha kaba katei ka trok kaba u ñiah ka la noh sha riat ha Lumshnong hajan Tool Gate kaba thmu ban kiew sha Khliehriat.