Press "Enter" to skip to content

Kyrpad ka SGPC ïa ka Sorkar Jylla ban ym pynkynriah ïa ki Sikh na Them Metor

Shillong, Jylliew, 13: Ki nongïalam jong ka Shiromani Gurdwara Parbandhak Committee (SGPC) mynta ka sngi palei ki la ïakynduh ïa u Myntri ka tnat Kam Pohing ka Sorkar Jylla u James K. Sangma bad aiti ruh da ka dorkhas jingdawa kaba kyrpad ban ym pynkynriah ïa ki jaidbynriew Harijan kiba buhai shnong hapoh Them Metor kiba la buhai shnong ha kane ka jaka naduh u snem 1853.
Kane ka kynhun jong ki saw ngut ki dkhot ka SGPC kiba la ïakynduh ïa u Myntri ka tnat Kam Pohing ki kynthup ïa u Harpal Singh Jalla, u Bhagwant Singh Sialka, u Additional Secretary kane ka kynhun u Paramjit Singh Saroa bad u Simarjit Singh.
“Ngi la kyrpad ïa ka Sorkar ba kan ai noh da ka patta khyndew sha ki jaidbynriew Sikh khnang ba kin dup lah ban shna noh ïa ki iing ki sem kiba paka bad kiwei kiwei ki jingdonkam ha kane ka jaka. Ïa mynta, kane ka jaka ba ki jaidbynriew Sikh ki shong ki sah ka long kum ka ‘slum’, ong u Bhagwant Singh Sialka ha ka jingïakren bad ki lad pathai khubor hadien ka jingïakynduh ïa u Myntri ka tnat Kam Pohing.
U la ong ba kane ka jaka kumba ka long mynta ka dei ka bym khuid bad bun na ki iing ki sem ki dei tang ki iing ba la shu shna malu mala tang ban ïada na u slap bad ka lyer.
Shuh shuh u la ong ba Shiromani Gurdwara Parbandhak Committee ka ieng pyrshah ban pynkynriah ïa ki jaidbynriew Sikh na Them Metor halor ka nongrim ba ki dei kiba la shong la sah ha kane ka jaka naduh ka por ki kmie ki kpa jong ki.
U la ïathuh ruh ba ki jaidbynriew Sikh kiba sah Them Metor ki la ïoh ban thep vote ha ka elekshon sha ka Iingdorbar Thawaiñ ka Jylla bad jong ka ri naduh u snem 1954. “Namarkata, ka Sorkar ka dei ban ïada ïa ka hok jong ki jaidbynriew Sikh,” ong u Sialka.
Ha kawei pat ka liang, u Myntri ka tnat Kam Pohing u la ïathuh ba um pat lah satia ban ai ïa kano kano ka jingkular namarba kane ka kam ka dang don hapoh ka jingkhmih jong ka High Level Committee ba la khlieh da u Symbud Myntri Rangbah, u Bah Prestone Tynsong.
“Tad haduh ba ka HLC kan da pyndep ïa ki kam baladep bynshet, ngam pat lah ban ai ïa kano kano ka jingkynthoh lane ka jingkular,” ong u James K. Sangma bad bynrap ba ka HLC haduh mynta ka dang trei ïa ka kam katkum ki kyndon ba la bthah da ka Iingbishar High Court.
U la ïathuh ba kane ka kynhun SGPC ki la pynpaw ïa ki jingeh ba ki jaidbynriew Sikh ki la mad khamtam ïa ka jingshah byrngem ha ka seng kiengatiar dang shen ka HNLC.
Une u Myntri ka tnat Kam Pohing u la ïathuh ba ka Sorkar ka la shimkhia bha bad ïathuh ruh ba ka Sorkar ka la pynkhlaiñ ïa ki bor pahara ha Them Metor.
Kane ka jingkyrpad jong ka Shiromani Gurdwara Parbandhak Committee (SGPC) ka la jia ryngkhat ruh hadien ka jingbyrngem jong ka seng kieng atiar Hynñiewtrep National Liberation Council (HNLC) lyngba u kyrwoh ba la phah da u General Secretary cum Publicity Secretary ka HNLC u Bah Saiñkupar Nongtraw hiar thma ïa ki jaidbynriew Harijan ba pynibor ban ïatynjuh bad ka Sorkar Jylla halor ka Them Metor, Iewmawlong nalor ka jing pyrshang wanrah ïa ka jingïashun jaidbynriew bad jingshongsyier.
Ka Ministry of Home Affairs (MHA) ka Sorkar Pdeng, ka la khot hajir ïa ka Sorkar Jylla sha nongbah New Delhi ban pan jingpynhai halor ki kynrum kynram kiba mih bad ki paid Harijan na ka bynta ka Them Metor, Iew Mawlong.
Na ka liang ki nongïalam ka DSGMC mynta ka sngi thohdieng hapoh ka jingïalam jong u Majinder S. Sirsa ki la leit ïakynduh ïa ki Heh Ophisar ka Ministry of Home Affairs (MHA) ha New Delh ha kaba ïadei bad ka jingjia ha Them Metor.
“Ki (Heh Ophisar ka MHA) la pynsngew ha ngi ba u Chief Secretary ka Sorkar Meghalaya u la ai ïa ka kaiphod ha kaba ïadei bad kane,” la pyntip u Majinder S. Sirsa lyngba ka Twitter.