Press "Enter" to skip to content

Plie u Myntri Rangbah ïa ka Solid Waste Management Project ha Nongpoh

Nongpoh, Jylliew 13: Hadien ka jingangnud ki paidbah ban treikam noh ka Solid Waste Management Project ha Umshangling bad kaba la sah teng mynta la bun bun snem, na ka liang u Myntri Rangbah ka jylla, u Conrad K. Sangma mynta ka sngi kum u kongsan u la leit ban plie paidbah noh ïa katei ka Project kaba don ha ka Shnong Umshangling ha ka thain Nongpoh ha ryngkat ka jingdon lang u Myntri ka tnad Urban Affairs, u Bah Hamlet Dohling.
Kiwei kiwei kiba la sakhi lang ha kane ka sngi ki kynthup ïa u Minister barim ka tnad Urban Affair bad uba dei u EM ka KHADC, u Bah Paul Lyngdoh, ki MLA na Ri Bhoi ba kynthup ïa u Bah Mayral Born Syiem bad u bah Jason Sawkmie Mawlong, u Director ka tnad urban Affair, u Bah E. Kharmalki, u Engineer inchief ka tnad Urban, u Bah Fedel War, u Bah C.B Syiem bad u bah Rayonald Kharkamni, kiba dei ki Chairman bad secretary ka Nongoh Town Committee, ki ophisar na ki tnad sorkar bapher bapher,ki Rangbah Shnong, ki paidbah bad kynthup ruh ki khynnah skul na ki skul ka thaiñ Nongpoh.
Kum ban pynkynmaw, kane ka Solid Waste Management Project ba la tei ha Umshangling la sdang naduh u snem 2007 ha kaba la bei tyngka lyngba ka skhim sorkar kmie ba la tip kum ka Jawaharlal Nehru National Urban Renewal Mission (JNNURM) ha ka jinglut kaba la kot 7 klur tam, hynrei kane ka project ka la sahteng na ka daw ka jingduna ha kaba mang tyngka ban pyndep ïa kane ka project.
Haba kren ha kane ka sngi kum u kongsan, u Myntri rangbah ka jylla, u Conrad K. Sangma u la ong ba ka sorkar ka la shim khia na ka por sha ka por halor ka Solid Waste Management ban wan rah ïa ka khuid ka suba ha ka jylla bad mynta ka sorkar ka la rai ruh ban pyntreikam noh ïa ka Solid Waste Management Policy.
“Nga dap ruh da ka jingkmen ban ioh lad ban shim bynta ha kane ka jingplie ia kane ka project bad u ai jingiaroh ruh naduh u MLA ka Nongpoh, ki nongialam ka Town Committee bad ruh ka Department kiba la shim khia ban ai ka jigniatrei lang ha kaba kane ka project ka la urlong bad ruh ki paidbah nangne shakhmat kin sa ioh jingmyntoi halor ka khuid ka suba bad ka koit ka khiah” ong u Conrad K. Sangma.
U la ong ruh ba ka sorkar ka la shim khia ruh ban pyndep noh ïa baroh ki project ba dang sahteng ha kaba ka sorkar ka la thaw ki lad ban mang pisa ban pyndep noh kham kloi kaba long hi ka jingmyntoi jong ki paidbah.
U la ong ruh halor ka Solid Management la donkam ban peit katkum ka kamai ka kajih ki paidbah, namar katba dang heh ka kamai ka kajih ka dang kiew ruh jingpyndonkam ha kiba bun ki liang, hynrei kum ki paidbah ki donkam ban nang ban tehlakam ïa ka rukom pyndonkam ba ki tiar kiba ngim pyndonkam shuh kam dei ban ktah ïa ka mariang bad ruh ki jingmih kiba mih na ka mei ramew dei ban pyndonkam bha ha kata ka rukom ban nym ktah ïa ka khuid ka suba.
U la ong ruh ki paidbah ki dei ban sgnewthuh ruh ban sumar ia ka mariang ym tang ban pynjot ia kiba marpoh khyndew kiba ai da ka mei mariang, nanmar kane ka ktah ïa ka Mei mariang lada ngim nang ban pyndokam ïa ki jingmyntoi ba ngi ioh na ka mei mariang.
Ban poi sha ka thong jong ka khuid ka suba ha ka jylla, u Myntri rangbah ka jylla, u Conrad K. Sangma u la ban khia ruh ïa ki khun samla bad ki paidbah nongshong shnong ka jylla bakin ïa snoh kti lang bad ka sorkar khamtam ka jingpyntreikam ïa ka Solid Waste Management Policy, kaba dei kawei na kathong jong ka sorkar ban pynlong ïa ka jylla kaba khuid kaba suba, u la bynrap.
Kiwei kiwei kiba la ai jingkren ha kane ka sngi ki k ynthup ïa u MYntri ka tnad urban affair, u Bah Hamlet Dohlieng, u Bah Paul Lyngdoh, uba dei u Myntri barim ka tnad Urban Affair, u MLA ka Nongpoh, u Bah Mayral Born Syiem, u MLA ka Umsning, u Bah Jason Mawlong, u Director ka urban affair, u bah E. Kharmalki, kiba la ban khia ban don ka jingiatrei lang na ka bynta ban wan rah ïa ka khuid ka suba naduh sor haduh ki shnong nongkyndong.