Press "Enter" to skip to content

Sahkut ka jingpyntrei ïa ki skhim MNREGS ha Langpih

Nongstoiñ, Jylliew 13: Ka jingpyntrei ïa ki skhim pynroi ba la bei pisa da ka sorkar pdeng kaba la ju tip kum ka Mahatma Gandhi National Employment Guarantee Skhim ka la long ka jingmyntoi kaba khraw ïa ki paitbah ha baroh ki shnong ha ka jylla khamtam eh ïa kito ki shnong ki ba dang sah dien ha baroh ki liang.
Haba phai ha ki shnong kiba hap hapoh ka West Khasi Hills la lap ba ka jing pyntrei ia katei ka skhim ka ïaid beit ïaid ryntih bha lait noh tang ha ki katto katne ki shnong khappud bad ka Assam kiba don ha ki jaka kiba dang don hapdeng jong ka jing bym pat lah ban ïa pynbeit ïa u pud u sam uba thikna hapdeng ki ar tylli ki jylla.Mynta ka sngi katto katne ngut ki rangbah na ka thaiñ Langpih ki bym kwah ban pynpaw kyrteng ïa lade haba ïakren bad u nongthohkhubor ki la ïathuh ba la kumba lai snem kynthih ka jingpyntrei ïa ki skhim shispah sngi ha katei ka thaiñ ka la dkoh bha khamtam eh ha ki katto katne tylli ki shnong bad ka daw ka long namar ba ki don katto katne ki nong shong shnong ki ba pynwit na ka por sha ka por namar ba ki kwah ban ma ki ki dei ban long ki nongpynïaid ha kaba pyntrei ïa katei ka skhim.
Haba pyrshang ban tohkit bniah la kita ki ba ju pynwit ki dei ne em kiba don ïa ki job cards (Jobcards holder) lane ki dkhot jong ki Village Employment Council (VEC) lane jong ka Area Employment Council (AEC) kiba hap ha katei ka thaiñ kitei ki rangbah ki la ïathuh ba katto katne ngut na kiba pynwit ki dei kiba don ïa ki jobcards bad ki don ruh na pdeng jong ki nongpynwit kiba wat tang ka jobcard ruh kim don hynrei ki kwah pat de ban shim kabu ha ka ban pyntrei ïa katei ka skhim.Ha kajuh ka por ki la ïathuh ba ha kine ki khyndiat sngi ki la don ki briew sorkar nap oh Mawshynrut Block kiba la wan sha ki shnong kiba don ha katei ka thaiñ bad haba ki rangbah shnong ki la pan jingshai halor ka jing sangeh ban pyntrei ïa ka skhim shispah sngi kitei ki briew sorkar ki la ong pynban ba katba dang don kitei ki nongpynwit bad katba kim pat lah ban pynsngewthuh ïa ki ba kim dei shuh ban bteng ïa ka jing pynwit yn ym lah ban pyntrei ïa ka skhim shispah sngi ha katei ka thaiñ.Ym lah ban len ïa ka jingshisha ba ha u snem ba la dep u Bah T.Diengan Block Development Officer (BDO) ka Mawshynrut Block u la hiar da lade ha Langpih ban lum lang ïa baroh ki paitbah nong shong shnong bad u la pynshai ruh ha kaba ïadei bad ka skhim MNRES .Nalor kata ha katei ka por u bah Diengan u la lah ruh ban pynbeit ïa baroh ki kynrum kynram bad da ka jingïamynjur lang jong baroh ki rangbah bad ki paitbah la jied ïa ki nongtrei kam ba thymmai jong ki VEC bad ka AEC khnang ba kin sdang noh ban pruid dak lane ai jingmut ha ka ophis jong ka Block ïa ki projek kiba dei ban pyntrei la ka long ïa ki surok shnong,ki lynti ïaid kjat,ki madan,ki pung dphkha bad bun kiwei kiwei ki projek kiba lah ban pyntrei lyngba katei ka skhim.Nalor kata ki la ïathuh ruh ba hadien ba la thung ïa kitei ki Council kiba thymmai na ka liang ki nongkitkam bad ki dkhot baroh kiba la dep jied ki la trei shitom bad mynjur lang ïa ki jingai jingmut jong ki Komiti kiba la ju pynlong na ka por sha ka por hynrei kaba lyngoh ka long ba kitei ki briew kiba wan na Block ki ai kynnoh kylla ba baroh ki paitbah ki dei ban ïa long kawei.Kitei ki rangbah ki la ong ruh ba ha ka jingshisha wat na ka liang ka sorkar ruh ka ju pynshai ba ïa kino kino ki nongshong shnong kiba pynwit bad khanglad ban pyntrei ïa ki skhim kiba ai jingmyntoi ïa ki paitbah ki bor ka aiñ ki dei ban kem bad pynshitom ïa ki.Namar kata lada kitei ki ba pynwit ha kaban pyntrei ïa ka skhim shispah sngi ha katei ka thaiñ ki long ka daw jong ka jingsahkut jong ki kam pynroi ki la dei ban ujor sha ki bor ba halor khnang ba ki paitbah ba bun ba lang kin ym duh ei ïa ki hok ba ki dei ban ïoh.