Press "Enter" to skip to content

Sha u Modi yn leit ud ka Sorkar MDA ba shah pynduh ka Agriculture University

Shillong, Jylliew, 13: Ka Sorkar Meghalaya Democratic Alliance (MDA) hapoh ka jingïalam u Myntri Rangbah u Conrad K. Sangma, ka la shim ïa ka rai ban sa leit ïakynduh markhmat ïa u Myntri Rangbahduh ka ri, u Narendra Modi ha kine ki sngi ban sa wan na ka bynta ban leit pynsngew halor ka jingshah pynduh noh ka Jylla Meghalaya ïa ka bhah ban ïoh ïa ka Central Agricultural University (CAU).
Ka Jylla Meghalaya ka la pan ïa ka Central Agriculture University naduh u snem 2010 bad ka la aiti ruh ïa ka jaka ba heh 226.37 spah akar ha Kyrdem kulai, Ri-Bhoi District sha u Vice Chancellor ka Central Agriculture University, Imphal u Dr SN Puri na ka bynta ban pynieng ïa ka University. Ïa kane ka jaka la aiti naduh ka 4 tarik Nohprah, 2014.
Hynrei ha ka jaka jong ka Central Agriculture University, la tei pynban da ka CentralAgriculture College ha kane ka jaka bad ïa kane la pynskhem da ka shithi ba la phah da u Dean of College of Agriculture, Kyrdem kulai u UK Behera sha u Director ka tnad Agriculture ka Jylla ban pyntip ba ka College of Agriculture ha Kyrdemkulai ka dei tang ka shnat jong ka Central Agriculture University jong ka Imphal.
U Myntri ka tnat ka Rep ka Riang, u Bah Banteidor Lyngdoh ha ka jingïakren bad ki lad pathai khubor u la ong, “ha kine ki sngi u Conrad Sangma un sa leit sha New Delhi ban ïakynduh ïa u Myntri Rangbahduh ka ri, u Narendra Modi ba un tuklar halor kane.”
Une u Myntri u la pyntip ruh ba u la dep ïakren ruh bad u Myntri ka tnad Agriculture & Farmers Welfare ka Sorkar Pdeng u Radha Mohan Singh haba ïadei bad kane ka kam ha ka 28 tarik Naitung, 2018 bad wat na ka liang u Myntri Rangbah ka Jylla, u Conrad K. Sangma u ladep phah ruh da ka jingthoh naduh u snem baladep hynrei haduh mynta kam shym la don kano kano ka jingai jubab na ka liang ka tnad Agriculture & Farmers Welfare ka Sorkar Pdeng
Kum ban shu kdew, u Lat barim ka Jylla u Ganga Prasad ruh u la dep ïakren ïa kane ka kam ha ka 2 tarik, Nailar 2018 hynrei haduh mynta ym pat shym la leh eiei na ka Sorkar Pdeng.
“Namarkata, ngi la rai ban leit tynruh ïa kane ka kam da kaba pynsngew ha u Narendra Modi namarba ka Meghalaya ka don hok shisha ban ïoh ïa ka Central Agriculture University, “ ong u Bah Banteidor.
Na ka liang ka Khasi Students’s Union (KSU) mynta ka sngi ka la leit ïakynduh ïa u Myntri ka Rep ka Riang, u Bah Banteidor Lyngdoh ban pan jingtip halor ka jingshah pynduh ka Meghalaya ïa kane ka Central Agricultural University.
U General Secretary ka KSU, u samla Donald V. Thabah ha ka jingïakren bad ki lad pathai khubor u la ong ba ka Seng kan ym pdiang ïa ka College hynrei kan ïai dawa beit ba ka Sorkar Pdeng ka dei ban tei da ka University ha Kyrdem Kulai.
“Lada ngim ïoh ïa ka University kumba ngi la ai ïa ka jaka, na ka liang ka seng kam banse ban shim da ki sienjam kiba tyngeh,” la ong une u Nongïalam ka Seng.
“Ngim kwah da ka College ka ban khyrwait shabi na Imphal hynrei ngi kwah da ka University kaba don pura ka bor halade ban shim ïa kano kano ka rai,” u la ong.