Press "Enter" to skip to content

Shimti ki CID ban tohkit halor ka jingïap ka Asst. Manager

Shillong: Hadien shi taiew ba la lap ïa ka met i Kong Ïohbianghun Sahkhar, Assistant Manager ka Orchid Hotel, Umïam na khlaw Umbir, ki Pulit ha ka sngi Palei ki la aiti noh ïa ka jingtohkit sha tnad Criminal Investigation Department (CID).
Ki Pulit ka RiBhoi District, ki la ïathuh ba la aiti noh ban tohkit ïa kane ka kam sha ka CID, namar ba ka Post Mortem Report ruh kam kren shai, la ine ki longkmie ba sah ha Umpling, i shah pynïap ne i pynïap hi dalade. “Ka Post Mortem Report ba la ïoh na ki Doktor kam shai, kumta ha kaba kum kane ka khep, ngi sngewdei ban aiti sha ka tnad CID ba kan tohkit khambha”, la ong ki Pulit.
Dei ha ka 6 tarik mynta u bnai ba shi kynhun ki longkmie kiba leit kheit tit na khlaw Umbir, ki la lap ïa ka met i Kong Iohbianghun,kaba la thiah lyngktop ha trai u dieng kseh ryngkat u tyllai plastik ba khum ha ryndang jong i. Ïa une u tyllai la teh ha une u dieng kseh.
Katkum ka jinglap ki briew, la ong ba une u dieng kseh um don tnad satia ba ine i longkmie in phasi hi ïalade. Ha kajuh ka por ruh ki don kiba pynpaw ba lada don kiba pynïap ïa i, kadei kaba la plan lypa, namar ba kumno kin rah tyllai plastik lypa.
Kaei kaba ym shai haduh mynta, ka long ha ka sngi ba i mih na ophis, i Kong Iohbianghun,i mih badno? Lane mano ba ïohi khatduh ïa i haba i mih na ophis?.