Press "Enter" to skip to content

T.12.5 klur la mang ban pyntrei ïa ka surok two lane na Mawroh sha Mawkynroh

Shillong, Jylliew :Shen yn sa shna noh ïa ka surok two lane ka ban sdang na Mawlai Mawroh ter ter shaduh Umjarain, Mawkynroh Umshing kaba la mang T.12.50 klur na ka Skhim Central Road Fund (CRF) jong ka sorkar pdeng. Kane ka surok ka ïaid lyngba ruh ïa ka shnong Umshing.
Ban pynurlong ïa kane ka jingthmu halor ki kam pynroi, u MLA Mawlai Bah PT Sawkmie hynne ka sngi u la leit jurip ïa kane ka surok ba la sdang naduh Mawroh ha ryngkat ka jingdonlang ki heh PWD, bah C Kharmudai, EE, bah S Lytep, SE PWD, Pa’iem Ainam Manik Syiem, u Rangbah shnong Mawroh, bah Peter Lamare bad ki nongkitkam shnong, (U RS bad nongkitkam shnong Mawroh.
Haba bteng ban jurip ïa ka surok na Umshing ter ter pat, nalor u MLA bad ki heh PWD la don ryngkat u Rangbah shnong Umshing bad ki nongkitkam shnong bad ynda la poi ha Mawkynroh Umshing la ïa jurip lang bad Rangbah shnong jong ka u bah L Nongkhlaw bad ki nongkitkam shnong.
Haba ai jingkren hadien ba la dep jurip u MLA u la pynpaw ïa ka jingkmen halor ka jingtrei shitom jong ka tnad PWD hapoh ka jingïalam jong u bah Kharmudai, kiba la lah ban pynkhreh ïa ki jingtyrwa (proposal) ban pynheh ïa kane ka surok.
U MLA ula ong ba la mang T.12.50 klur la mang ban shna pynheh ia kane ka surok, sha ka two lane.U la ong ruh, “Ngi donbok bha ban ïoh ïa kane ka surok bad hap ban ai khublei ïa ka sorkar kaba la lah ban mang ïa kane ka skhim namar ba kumba ka long kane surok ha ka jingshisha ka hap ha ki rural area, kaba ngim shym khmih lynti ban ïoh, hynrei mynta ngi la ioh.”
U Bah Sawkmie ula ong ruh ba hen kin sa shna noh ïa kane ka surok ha ka jingbha kum ki surok bye-pass, bad ynla da dep kin sa ïohi ïa ka jingkylla, jingkiew jong kane ka thaiñ bad ngi la khmih lynti ruh ba kane ka surok kan sa long kawei na ki surok ba kiba bun bha ki kali kin ïaid. Nalor kata u pyntip ruh ba la kumno kumno ha u bnai Nailar mynta u snem, kin sa lah ban plie noh ïa ka Mawlai bye-pass bad u la khmih lynti ba kane ka surok ka lah ban poi sha u pud ba kan mih ka jingdheng kali.
Kumta ban lait na kum kine ki jingeh, u MLA u la pyntip ba shuwa ban plie kin sa pynlong ïa ka jingïalang bad ka tnad traffic kumno ban lait na kine ki jingeh kiban sa wan ha kane ka surok.U MLA u la ai khublei bad pynpaw ruh ka jingsngewnguh kaba khraw ïa u Pa’iem Ainam uba la kohnguh bad mynjur ban noh synñiang ïa ki jaka na ka bynta ban pynïar, namar kane ka surok ka ïaid lyngba ka khlaw u Syiem. U MLA ula ong ba lada dei ba ki hap ban thied da ki klur ki pisa ngi la hap ban pynlut ban thied ïa ki jaka na ka bynta kane ka surok, namar kata ngi dap da ka jingsngewnguh ïa u Paiem Ainam.
Ha ka juh ka por u la ai khublei ruh ïa ki riew shimet, ki shnong kiba la long la kloi ban ïatrei ryngkat bad ka tnad PWD ban pynurlong ïa kane ka kam kaba bha ka ban pynmyntoi, ym tang ïa ka thaiñ, hynrei ïa ka jylla hi ruh baroh kawei.U MLA u pynkynmaw ruh ba shen kin sa shna thymmai noh ruh ïa ka jingkieng Wahumkhrah, Mawlai Nongpdeng, ba la mang T.5 klur bad ïa ka rim kin sa pynpra noh.