Press "Enter" to skip to content

Wat ai NoC ïa ka Assam ban trei ïa ka Khri Project, dawa ki paidbah Kyrshai

Nongstoiñ, Jylliew 13: Ka jingïalang jong ki 24 tylli ki shnong ryngkat bad ki sengbhalang kaba la long hynnin ka sngi ha Borjhar M.E School Assam, ka la rai ban phah jingthoh hakhmat u Myntri Rangbah ka Jylla ba um dei ban ai ïa ka NOC ïa ka Assam ban tei ïa ka projek bording ha Wah Khri kaba don ha khappud Meghalaya Assam.
Ha kane ka jingïalang ba la don ruh da ki nongïalam sengbhalang ba kynthup ïa ka FKJGP, Garo Students Union, Garo National Council bad All Rabha Students Union, la rai ban ieng skhem triang ban da lei lei ym bit ban ailad ïa ka Assam ban den ïa katei ka Wah lym kumta ym don shnong ym don thaw shuh ha katei ka jaka.
Ka jingïalang ka la ïakren sani bha halor ka jingshah ktah ki shnong ki thaw, ki jaka rep bad kiwei kiwei bad kumba 24 shnong kin shah ktah bad palat 10 hajar ngut ki nongshong shnong kin kylla phet wir.
Hapdeng ka jingïakren kaba sani bha halor kane ka kam, ka jingïalang ka la rai ban pynkylla noh na ka Adhoc Committee Against Hydro Power Electricity Power Generation sha ka Ukiam Kyrshai Joint Committee. Kane ka komiti ka la rai ruh ban aiti sha ki shnong bapher bapher ba kynthup ïa ki shnong ba na Meghalaya, Assam bad Garo ba kin lum ïa ka jingdon jong ki nongshong shnong bad ki jaka puta ba ki don ha ki shnong jong ki bad aiti sha ka komiti ban leh ïa kaba donkam.
Hadien ba la ïohlum jingkhein ka komiti kan sa leit hakhmat ki Myntri rangbah Meghalaya bad Assam ban dawa ba ki dei ban shimkhia halor kane ka kam bad khamtam eh ba u Myntri rangbah ka Meghalaya ba um dei ban kohnguh ïa ka Assam da kaba ai NOC. Lada ki ar sorkar kim sngap ïa ka jingujor jong ki, kim banse ban ïaleh pyrshah bad ïaid la ka lynti da kaba pynlong da ki rally paidbah bad kiwei kiwei ki jingïakhih.
Haba ïa kren bad u President jong ka FKJGP Kyrshai Area Unit Bah Francis Sohshang bad Secretary Bah Probin Snar, ki la pynpaw ïa ka jingsngewkhia halor kane ka mat. Ki da ong ruh ba kane ka kam jingthmu jong ka Assam ka dei ka kam ba baroh kin shimkhia lang namar ka dei ka ishu bad ka ïap ka im jong ki paradoh para snam kiba shong ba sah ha katei ka thaiñ.
Ki nongïalam ki la kyntu ruh ïa u MLA bah Kimfa Sidney Marbaniang bad MDC Bah Bajop Pyngrope, ba kin shimkhia ïa kane da kaba kyntur sha ka sorkar ba ka dei ban leh ei ei ban ïada ïa ki paidbah nongshong shnong ha kane ka thaiñ.