Press "Enter" to skip to content

Ym don jingma shuh ka Meghalaya na jinghiar thma ki ñiangbam jhur : Banteidor

Da ka ïew kyrpang ban die ïa ki jhur ym ai dawai
Shillong, Jylliew 13 : U Myntri ka tnad ka Rep ka Riang ka jylla, Bah Banteidor Lyngdoh ha ka sngi Palei u la pynbna ba ka Meghalaya mynta kam don jingma shuh na ka jingshah hiar thma ha ki khñiang bam jhur ne kita ki ‘fall army-worm’, kiba dei ki jait khñiang kiba pynjulor lut ïa ki jingthung kynthup naduh ki jhur ki jhep haduh ki riewhadem ruh kumjuh.
Haba pynbna ïa kane hadien ka jingïalang bad u Myntri ka tnad ka Rep ka Riang jong ka sorkar pdeng u Narendra Singh Tomar lyngba ka video conference ha Directorate of Agriculture, u Bah Banteidor u la ong ba na ka liang ka Department ki lah ban tehlakam ïa utei u khñiang nalor ba ki la kular ruh ban ïarap ïa kito ki nongrep ba shah ktah.
Katkum ka jingïathuh jong u, ki don haduh lai tylli ki distrk kiba la shah pynjulor ha utei u khñiang, kata ka East Garo Hills, West Jaiñtia Hills bad ka East Khasi Hills. “La dep shna ruh ïa ki dawai ban synreit ha kito ki jaka ba don kito ki khñiang. Ngi la ïoh ruh ïa ka kaiphod ba ki khñiang ki la nang duna,” bynrap shuh shuh u Myntri.
Ha kajuh ka por u la ïathuh ruh ba ka tnad ka buh hakhmat eh ban pynlong ïa ka Meghalaya kum kawei na ki jylla ba thung ïa ki jhur ki jhep ne ki mar rep khlem da pyndonkam da ki sboh dawai.
“Ka tnad ka la don ha lynti mynta. Donkam ban leit sha man la ki blok bad ki distrik ban hikai ïa ki paidbah nongrep halor katei ka bynta. Ka tnad kan leit shwa ban hikai nangta kan sa ai jingïarap ym ban ïarap shwa sa ai jinghikai,” u la bynrap biang.
Shuh shuh u ong ruh ba ki briew mynta ki la sngewthuh ïa ka jingkordor ka jingkoit jingkhiah, na kata ka daw ki wad beit ban thied ïa ki jhur bad ki mar-rep ba thung khlem dawai. Hynrei namar ka jingbym don ki iew ba die kyrpang ïa kitei ki mar rep, u Myntri u la ïathuh ba ka tnad kan shimkhia ban buh noh kawei ka kynja iew kyrpang kiban die tang ïa kitei ki jhur kiba thung khlem da pyndonkam dawai.